I Div Club 2 - 0 MPL Club
MFA Super Cup-ah Chanmari West FC leh Ramhlun North FC ten Mizoram Premier League club dang-lamna an lantir thei lo a, Inrinni khan Aizawl DFA hnuaia first division club Chawnpui FC leh Venghlui FC ten hnehna an chang.
RG Stadium, Mual-puia inkhel hmasa zawk-ah Chawnpui FC-in Mal-sawmzuala (32') leh Lalrin-hlua Hmar (83') te goal hmangin Chanmari West FC 2-0 in an hneh a, Venghlui FC-in minute 49-naa Lalrem-ruata goal hmangin Ramhlun North 1-0 in an hneh ve bawk. Naktuk zan dar 7:30 hian Chawnpui leh Venghlui te hi quarterfinal khel turin Lammualah an inhmachhawn ang.
Upset?
Chanmari West FC leh Ramhlun North FC te hi MPL club an nih avangin chak rinkai zawk an ni ve ve a, an chak loh takah chuan inkhel result hi 'upset' a ni. Chutihrualin inkhel pahnih thlirin 'upset' hi thleng ta lo se chuan MPL club te hi an vannei tihna a ni ang - first division club Chawnpui FC leh Venghlui FC ten chak an phu ve ve.
Goal hnih chauh
Chawnpui FC-in mid-fielder Lalchhuansanga leh Laldawngkima (D-a) hmangin inkhel an thunun a, forward H. Lalzawmliana a club hlui West Warrior lamah a tal na hle bawk. Chawnpui winger Malsawma'n first division club tana goal hma-hruai a khung theihna tura D-a leh Rinhlua te inthlawp tawn a mawi a, minute 83-naa Armed Veng tlangval Rinhlua 'solo goal' in MPL club beiseina titawpin hun tawp dawnah West Warrior player pawimawh R. Laldanmawia chu hnawhchhuah a ni.
Chanmari West-in an player ṭha ṭhenkhat an awltir an tuar a, first half tawp hmaa Lalbiakhlua hlah bak goal chance ṭha bik an nei lo. Chawnpui FC-in last 16 lut tura vawi hnih an chak tawhna RG Stadium-ah attacking football an khel a, an phu ang ngeiin hnehna an chang bawk.
Chawnpui FC coach Lal--din-thara chuan, "Zir ang zawng zawngin khelh theih loh mah se kha aia ṭha kha chu ka beisei ngam lo. Goal hnih aia tam khung thei tur kan ni a, khelmual chhungah kan chungnung zawk. Referee-te hian MPL club hi a chhan lutuk hret a ni," tiin an khelh dana a lungawi thu a sawi a, referee chungah erawh a lawm lo.
Venghlui an lam
Venghlui FC hotuten Ram-hlun North FC tum tura an inpeih thu an sawi lawk a, an thusawi dikna langin I Day Football finalist-in fiahna an paltlang zo lo. First division club hian awmze neiin goal an venghim a, Venghlui FC hi khelmual chhung leh pawnah chungnung zawk bawk.
Lalruatliana Sailo-in an player langsar Vanlal-thlamuana squad-ah a dah loh avangin Ramhlun North-in an khingpui Venghlui FC aiin player an nei hraw bik lo. Amaherawhchu MPL club an nih avangin Tawia nauten pressure an ngah zawk a, attacking football an khelh a
ṭul bawk. Ramhlun North goal nawr dang turin Venghlui coach Lalmalsawma'n a naute hna a sem ṭha tih a lang a, ball an chan loh laia goal venhimna chang hre lo pakhatmah an awm lo.
Goal nawr kawngah Sawm-tea (Kolkata club Chi-rag captain hlui) hian amah ang bawka palian lo mah se ball thiam midfielder James Lalhmingsanga a hmang thiam a, goal awmchhun pawh Republic Veng tlangval freekick pet aṭanga Remruata a khung a ni. Ramhlun North tlar hnung tan Tuikual North tlangval Remruata a hnawksak a, chutihrualin Venghlui FC chakna hi mimal hnahthawh a ni lo - entu mipui-te pawhin an an chanvo (player auh phur) an tlin hle.
Ramhlun North coach Lalruatliana Sailo chuan, "Inkhel kan thunun zawk a, kan goal nawr a na tawk lo. Ka nauten theihtawp an chhuah a, goal venhim tum team laka hnehna chang thei turin ṭan kan lak a ṭul a ni. Venghlui hi team ṭha an ni a, chutihrualin an chance neih te kha counter attack hmanga an neih a ni," tiin inkhelh a hmuh dan a sawi.
Venghlui coach Sawmtea chuan, "Kan inpuahchahna a ṭha a, kan ṭangrual bawk. Kan thlen chinah kan lawm a, tawp mai erawh kan tum lo - theihtawp chhuahin kan kal zel ang," tiin an thawhrim thu Vanglaini palai a hrilh.