Liverpool vul chhung a rei lo

Emirates Stadium-a Arse-nal hneh hlim Liverpool phur viau mah se an phur chhung a rei lo hle - Inrinni zan khan Premier League kai thar Burnley lakah 2-0 in an tlawm.

Inkhel pumpuia 19% lek ball changtu Burnley hi 2003-04 season aṭanga statistics record mumal tak neih a nih hnua heti zat lek ball chang chunga Premier League-a chak thei hmasa ber an ni.

Premier League champion Leicester City leh Arsenal chu King Power Stadium-ah goal khung loin an inhnehtawk a, team pahnihin league match hnih an khelh tawhah chak hmel an la hmu thei lo.

Tlar hnung buai Reds

Liverpool-in Gunners lak-ah goal li an khung thei a, chumi rual chiaha hriat tel ngai chu goal thum an chhuah tel tih hi a ni. Reds manager Jurgen Klopp-a'n Gunners laka chesual left back Alberto Moreno chu inkhelh hmain chhan viau mah se Burnley lakah a ring nawn lo, a aiah hian midfielder James Milner chu left back-ah chhawr a ni!

Liverpool tlar hnung an la harh chuang lo - inkhel
ṭan aṭang-a minute hnihna lek-ah Nathaniel Clyne-a'n tihsual a nei nghal a, Reds right back chetsual chhawr
ṭangkaiin Burn-ley striker Sam Vokes-a'n mualneitu tan goal hmahruai a khung.

Mikhual team-in an si phurh sut tumin bei mah se Burnley bawkin goal an khung leh a, minute 37-naah Andre Gray chuan a duh tawka Reds tlar hnung a chaih phar hnuah an goal hnihna a khung - Liverpool tlarhnung chaihtu striker hian kum 2012 kha chuan non-league club Hinckley United tan a la khel a, Reds lama a goal hi Premier League-a a goal khung hmasak ber a ni.

Brazilian midfielder Phi-lippe Coutinho thiamna hmang-in Liverpool-in chak ngei tum mah se hun tawp thlengin goal an khung thei lo a, a tawpah an mualpho.

Klopp a phang lo

Liverpool boss Jurgen Klopp chuan, "Season ṭantir chauh a la ni a, 100% in kan la inpeih lo niin a lang. Kan theihna zawng zawng nen kan thawk chhunzawm ang a, tlar hnung lam insiamṭhat kan ngai tih hi chu sawi nawn ngai loa kan hriat sa a ni," tiin hnualna tur a la awm loh thu a sawi.

Gunners an vannei ?

Premier League-a an match hmasa berah Leicester leh Ar-senal an chak zo lo ve ve a, an chak hmasak ber hmuh tumin King Power Stadium-ah an inhmachhawn. Mahse, team pahnih hian minute 90 chhunga goal an khung loh miau avangin point khat ve ve an insem.

Foxes fans tana ngeiawm ber tur nia lang chu referee Mark Clattenburg a ni - Arsenal defender Laurent Koscielny-a'n Danny Drinkwater a tih tluk leh Hector Bellerin-a'n substitute Ahmed Musa laka a foul chu chu penalty ngei tur niin lang mah se penalty spot a kawk tlat lo.

Jamie Vardy chuan nipui bazar-a amah lakluh tumtu club lakah goal a khung thei lo a, hnai set sawt aṭangin a pet out. Arsenal keeper Petr Cech chuan Riyad Mahrez-a hun ṭha neih chu a khawhral sak bawk. First half-a inkhel thununtu Gunners tan Alex Oxlade-Chamberlain chuan an hun ṭha neih a chhawr ṭangkai thei lo.

Manager an lawm

Leicester boss Claudio Ra-nie-ri chuan, "Goal kan chhuah loh avangin ka lawm a ni. Arsenal tan hmun awl kan siam loh mai bakah goal khungna hun ṭha kan insiam fo thei a, penalty-ah chuan referee thutlukna apiang ka pawmpui a ni," tiin match official a sawisel duh lo.

Arsenal manager Arsene Wenger chuan, "Inkhel pum-pui thlirin kan khel ṭha a, team pahnihin game hmuhnawm tak kan khel. Kar hmasa lawka kan khelh dan ngaihtuah chuan kan khel ṭha takzet a ni, " a ti.

Inkhel dang

Tottenham Hotspurs-in an match hmasa bera Everton an draw hnuah Crystal Palace 1-0 in an hneh a, Southampton aṭanga Spurs zawmtu Victor Wanyama chu goal khungtu a ni.

Everton pawhin chak hmel an hmu ve ta a, West Brom khelmuala inkhelah mual neitu team tan Gareth McAuley-a'n goal hmahruai khung mah se Everton hian Kevin Mirallas leh Gareth Barry hmangin an chhanglet a, 2-1 in an chak.

Inkhel Results

Burnley 2 - 0 Liverpool

BUR: Sam Vokes 2'; Andre Gray 37'

Leicester City 0 - 0 Arsenal

Tottenham 1 - 0 Crystal Palace

TOT: Victor Wanyama 82'

West Brom 1 - 2 Everton

WBM: McAuley 9'

EVE: Kevin Mirallas 45+2'; Gareth Barry 60'