Barcelona-in Betis lakah goal an sur tir

La Liga champion Barcelona chuan season thara an league match hmasa berah an mikhual Real Betis lakah zahngaihna an lantir lo a, striker Luis Suarez a goal thum leh Lionel Messi-a goal hnih hmanga 6-2 a sawpin point thum an hmu nghal.

Barcelona tan Neymar chu Rio Olympic-a a inlan vangin Nou Camp-ah a hmel kan la hmu lo a, captain Andres Iniesta chu hliam vanga a la inkhelh theih loh avangin Messi-a'n captain armband a hreng.

Goal a sur

Manager Luis Enrique-a'n tlar hma veilam sirah Arda Turan a awm tir a, a tisual lo. Turkey in-ternational hian inkhel ṭan aṭanga minute rukna lekah goal hmahruai a khung. Barca hian awlsam takin hnehna an chang dawn niin lang mah se striker Ruben Castro chuan minute 21-naah freekick aṭangin an si phurh a sut!

Amaherawhchu, mikhual Real Betis tan an goal hi lawmna aia lungngaihna thlentu mai a ni. Catalan club hian season hmasa Spanish golden boot dawngtu Suarez (42', 56', 82') leh Messi (37', 57') te hmangin goal an khung zui a, hun tawp dawnah Castro-a'n goal khung ve leh mah se awmzia a nei tawh lo.

Barcelona hian goal ruk an khung a ni satliah lo a, minute 90 chhungin ball 73% changin goal khung tumin vawi 30 zet an khingpuite goal-ah an pet, heng zianga 12 chu goal zawnah kalin a zatve a lut. Barca hian mi-mal ṭhatna tur bikin an khel loa, an zavaiin an ṭangrual a, ball an inpe kual nasain a hmuhnawm tel bawk - cham-pion khelh dan tur dik takin an khel tiin a sawi theih.

Suarez nge nge...

Liverpool striker hlui hian Premier League-ah a goal khung theih zia a lantir hnuah La Liga lamah khawvela striker hriam ber a nih zia a pholang leh tawh a, season hmasa league nomawi an chawi theih nan a thawhhlawk hle a, season hawn nan hat-trick a siam lehnghal bawk.

Uruguay international hian season hmasa an league match hnuhnung pangah goal 14 khungin a club hnehna a chanpui vek a, an match hnuhnung bera Granada 3-0 a an hneh ṭumin hat-trick siamin an champion zui - heng inkhelah hian point hloh nise Real Madrid lakah nomawi chân thei an ni.

A la tawk lo?

Minute 90 chhungin goal ruk an khung a, awlsam tak-in point thum hmu mah se Bar-celona manager Luis Enrique chuan an ṭhat dan ber a la nih loh thu a sawi chhuak!

Barca a enkawl hmasak ber ṭuma treble champion ni thei Enrique chuan, "Kan ball pet dan leh rilru puthmangah a
ṭhat theih dan ber kan tawng
ṭep. Ka player-ten chak duhna thinlung an nei tih ka hmu a, kha khan min ti lawm. Nou Camp khat tlata mipui min
ṭan tura lo pungkhawmte khan min ti lawm a, inrintawkna min siamsak," tiin a sawi.

Inkhel dang

Inrinni zan inkhel dangah Europa League champion Sevilla chuan manager thar Jorge Sampaoli kahhruaina hnuaia an legaue match hmasa berah Espanyol chu 6-4 in an sawp a, Granada leh Villarreal te chu 1-1 in an inhnehtawk bawk.

UEFA Super Cup leh Super-copa de Espana-ah Real Madrid leh Barcelona hneh lo mah se an league match hmasa bera hnehna an chan avangin Sampaoli chuan a naute khelh danah a lawm thu a sawi.

Copa America-a Chile lo champion pui tawhtu Sampaoli chuan, "Vawiinah khan chak duhna thinglung nei, huai-sen taka goal khung tuma khingpuite beitu ka hmu - kha kha kan khelh dan tur pawh a ni reng a ni," tiin a naute khelh danah a lungawi thu a sawi.