Juve tan Higuain-a'n goal a khung nghal

Inrinni zan khan champion lai Juventus chuan tun season-a an league match hmasa ber an khel a, striker thar Gonzalo Higuain goal hmangin Fiorentina 2-1 in an hneh.

Juventus Stadium-a inkhelah first half-a Real Madrid midfielder hlui Sami Khedira goal khung hmangin mualneitu lamin hma an hruai. Second half-ah Blackburn player Nikola Kalinic chuan Fiorentina tan minute 75-naah an si phurh sutna goal a tauh lut a, 1-1 chiah a ni.

Minute 66-naah manager Mas-similiano Allegri chuan Mario Mandzukic la chhuakin Napoli aṭanga paound maktaduai 75.3-a a lakluh Higuain a luhtir. Argentina international hian manto taka lei a nih zia lantirin khelmual a luh
aṭanga a ball khawih hmasak ber chu angle zim tak aṭangin chakna goal ni turin a khung nghal.

Juventus boss Massimiliano Allegri chuan a striker thar fakin, "Higuain ball khawih in hmuh chuan goal kan nei hnai tihna a ni. Ani ang player ṭha kan nei hi kan vannei hle. Tun nipui chhungin player panga kan lalut a, anni hian Juve khelh dana khel tur chuan hun an la mamawh deuh, goal tam zawk kan khung zel ang," a ti.

A club thar tana league goal hmasa ber khungtu Higuain chuan, "He goal hi ka chunga rinna nghat ngamtu zawng zawnte tan ka hlan. Ka match hmasa bera goal ka khung nghal thei hi ka lawm a, hetianga kal chhunzawm zel pawh kan tum ang," tiin a phur hle.

Inrinni zan inkhel dangah Roma chuan Udinese lakah first half-ah goal khung lo mah se second half-ah Diego Perotti goal hnih leh Edin Dzeko leh Mohamed Salah te goal khat ve ve khung hmangin 4-0 in an sawp.