Everton-ah Lukaku a cham dawn - Koeman

Ronald Koeman chuan Romelu Lukaku-a'n a rei lo berah tun season tal chu Everton tana a khelh tur thu a sawi chhuak.

Kum 23-a upa Belgium international striker Lukaku hi a club hlui Chelsea lamah a let leh dawn niin khawtlang media ten an ziak nasa a, amaherawhchu Dutch manager Koeman chuan, "Season khat tal chu kan bulah a la cham ang, club chhungkaw tan chuan chanchin lawmawm a ni," tiin Lukaku chungchang a sawi.

Lukaku hian Everton-in West Brom 2-1 a an hneh ṭumin first half-ah substitute aṭangin a lut a, Belgium forward luh hnuah hian Toffees goal nawr a na sawt. Kum 23-a upa striker hian 2013-14 season khan loan-in Chelsea aṭangin Everton hi a zawm a, goal 16 khung nghalin Toffees hian club record ni turin pound maktaduai 28-in an la nghet.