Palace striker thar Benteke

Crystal Palace chuan Liverpool striker Christian Benteke chu pound maktaduai 27-in an lalut a, Belgium in-ternational hian kum li chhung atan contract ziakin a khelh ṭhat dan a zirin a man hi pound maktaduai 5 thleng a sang chho leh thei ang.

Kum 25-a upa striker hian July, 2015 khan Aston Villa aṭangin Liverpool hi pound maktaduai 32.5-in a zawm a, Reds tan a season khatnaah goal 10 khungin manager thar Jurgen Klopp-a hnuaiah league match riatah chiah inkhel bul a ṭan thung.

Belgium tan vawi 26 inlana goal ruk khungtu striker chuan, "Crystal Palace tan khel tura in-remna kan nei thei ta hi ka lawm takzet a ni," tiin Eagles a zawm thei chu a lawm thu a sawi.

Alan Pardew-a en-kawl Palace hian nipui transfer bazar-ah Benteke hma hian player pathum Andros Townsend, James Tomkins leh Steve Mandanda te an lalut tawh.