Police kalkawngah Dinthar FC

MFA Super Cup quarterfinal match hmasa berah Dinthar FC leh Mizoram Police FC te vawiin tlai dar 2:30 hian Lammualah an inkhel ang a, Zo United leh Chanmari FC ten an chhunzawm nghal ang.

Police vs Dinthar

Mizoram Police-in MPL
ṭan hmain I Day Football-ah nomawi an chawi a, Mizoram-a football inelna sang berah Police an lian nghal bawk. Police hian January 24, 2013-ah Dinthar FC an hneh lo a, hemi hnu hian MPL hmahruaitu chu Police tho an la ni. Amaherawhchu Mizoram aiawha an fehchhuah an tawrh avangin an chesual chho a, season a tawp meuh chuan an chung chiaha awm Dinthar FC chu point liin an pha lo.

MPL hmasa bera Police champion theihna tur daltu chu Dinthar FC an ni a, MFA Super Cup-ah an dal leh thei ang em tih hi zawhna chhan harsa niin a lang lo. Vawiin hian Police hi first division club ni mah se chak zawk tura rinkai an ni a, an player neih dana chhutin vawiin hian Dinthar FC-in hnehna an chang thei a nih chuan tualchhung football hrechiang chin chu a barakhaih ang.

Ṭialthawnga enkawl Police hian quarterfinal thleng turin goal 21 an khung a, MPL club Chhinga Veng lakah pawh goal thum ngawt khung thei an ni. Amaherawhchu Police hian an match khelh tawhah goal an la chhuah vek avangin an tlar hnung a phui bik lo a, Dinthar FC tlar hmaa awm Michael Lalremruata, Samuel Laltlanthanga leh Lalruatpuia te an chet ṭhat erawh chuan MPL club hian hnehna an chang thei ang.

Dinthar FC-in quarterfinal lut turin captain Samuel-a goal hmangin Ramhlun FC an hneh a, first division coach Lalngaihawma chuan, "MPL club ni mah se an chungnun bikna a awm lo," tiin inkhelh zawhah a sawi. MPL champion hmasa ber hian tun hma anga team dang hlauh ni phak leh tur chuan Police an hneh hi a ṭul takzet a ni.

Zo United Vs Chanmari

Chanmari FC-in I Day Foot-ball-a Ramhlun North FC an hneh loh hnuah inrintawkna an hloh a, second division club Zarkawt FC pawhin an chhaih buai pha hial. MFA Super Cup kalphung hmasa zawka vawi hnih champion tawh Chanmari FC hian I Day Football-a an mualphona an hliahkhuh a ṭul a, amaherawhchu an khingpui tur hi Zo United an nih tlat avangin a awlsam dawn lo tih a chiang reng mai.

Coach Lalsangzuala Hmar tana thu lawmawm chu Malsawmfela leh Lalruatfela Zote te'n an chet ṭhat an chhawm nung chho zel hi a ni a, Chanmari forward pahnih hian Zarkawt FC 4-2 a an hneh ṭumin goal an khung ve ve. Zo United lamin 1st Bn MAP Academy an hneh ṭuma captain Malsawma Chhangte hnawhchhuah a nih avangin an chhawr thei dawn lo a, Champhai tlangval aiawh turin Luangmual defender hui Lalnunpuia a chetṭhat nghal a ṭul ang.

Zo United hian first division club zinga ṭha ber pawla ngaih 1st Bn MAP Academy hneh tur hian harsatna lian tham an tawk lo a, 3-0 a hnehna an chan avangin inrintawkna nen Chanmari FC hi an hmachhawn dawn. Vanlalrova naute hian defensive game an khel thiam tih I Day Football-ah an lantir tawh a, attacking football khel ṭhin Chanmari FC nena an inkhel tur hi a hmuhnawm ang.