Usain Bolt Bolt Bolt

Usain Bolt chuan intlansiak khawvela ropui ber a nih zia a lantir leh ta. Jamaican sprinter hian Rio Olympic-ah 100m leh 200m-ah hnehna a chan hnuin Inrinni zing khan 4x100m relay-ah an ram a champion pui leh. Bolt hi intlansiak huangah bik Olympic vawi thum intlansiak chi thuma pakhatna ni vek thei hmasa ber leh awmchhun a ni.

Kum 29-a upa Bolt bakah Asafa Powell, Yohan Blake leh Nickel Ashmeade te chuan gold la turin second 37.27 chiah hun an hmang. Beisei loh takin Japan chuan silver an dawng a, pathumna United States chu disqualified an nih avangin Canada-in bronze an dawng bawk.

'Triple Triple'

2008 Beijing leh 2012 London Olympic-ah te khan Bolt hian 100m, 200m leh 4x100m relay-ah te gold a lo la tawh a, kuminah heng inelna pathumah hian pakhatna a ni leh vek.

Track and field huangah bik chuan USA sprinter leh long jumper ni bawk Carl Lewis (1920, 1924, 1928) bakah Finland long-distance runner Paavo Nurmi (1984, 1988, 1992, 1996) te chuan Olympic gold medal pakua an lo la tawh a, anni pahnih leh Bolt te chiah hi mimal zingah gold medal pakua la thei an la ni.

Bolt chuan, "Zin kawng thui tak a ni a, ka thlir let hian a ngaihnawm ka tiin hun harsa leh hautak ka paltlang tawhte khan hlimna min siamsak tawh zawk. Tunah chuan mi ropui berte zinga ka tel ve tawh tur hi ka lawmin ka inchhuang ve hle," a ti.

Zawhna chhangin Bolt chuan, "Olympic hi ka ngai dawn a, fan-te ka theihnghilh ngai lo ang, anni vanga hetiang dinhmun thleng thei hi ka ni. Media-te, infiam nana mi ṭhahnemngai leh tha thawh ṭhin zawng zawngte an fakawmin a lunglen thlak dawn hle," tiin a Olympic hnuhnung ber a mangṭha.

Tokyo Olympic 2020-ah chuan Bolt hi kum 34-a upa a lo ni tawh dawn a, intlansiak turin a inlan tawh lo ang. Khawvela tlan chak ber hian 2017 World Championship, London a neih zawh hunah chuan infiamna khawvel a mangṭha tawh tur thu a lo sawi lawk tawh a ni.