Chong Wei hnehtu Long a champion

Inrinni zan khan Rio Olympic mipa singles badminton final khelh niin China tlangval Chen Long chuan world number 1 Lee Chong Wei 2-0 a hnehin gold medal a dawng.

Malaysian shuttler Chong Wei hian semifinal-ah 2008 Beijing leh 2012 London Olympic final-a a hneh lo Lin Dan a hneh avangin champion zui thei tura ngaih a ni. Mahse, final-ah erawh thil a danglam - inkhel hmuhnawm leh inhnehtawk takah world number 2 Long-a'n 21-18, 21-18 in hnehna a chang a, ranking chhuak thar berah chuan number 1 dinhmun a luah bawk ang.

Asian champion vawi hnih ni tawh Chong Wei hi player ṭha leh theihna sang tak nei ni mah se Olympic hnuhnung vawi thumah silver dawngtu zawkah a ṭan a ngai a, kum 33-a upa a nih tawh avangin tun ṭum hi a tan Olympic hnuhnung ber a ni tawh tura ngaih a ni.

Number 1 thar tur Chen Long chuan a medal dawn chu an ram tan a hlan thu a sawi a, hetihlai hian Olympic silver medal vawi thum dawng tawhtu ChongWei chuan amah ṭantute duhthusam a tih hlawhtlin theih loh avangin hrehawm a tih thu a sawi thung.

Bronze medal inchuh naah Denmark tlangval Viktor Axelsen chuan world champion vawi nga ni tawh Lin Dan chu 15-21, 21-10, 21-17 in a hneh ve bawk. Mipa bad-minton-a hun rei tak roreltu Lin Dan tan kumin hi a Olympic hnuhnung ber a ni tawh a, medal nen a hun tawp hman duh mah se a duhthusam a thleng dik thei ta bik lo.