Pep, Mourinho, Conte, Phelan - 100%

Premier League ṭan hmaa manager thawm lian pathum Pep Guardiola, Jose Mourinho leh Antonio Conte te enkawl club-te'n match hnihah point ruk an hmu nghal a, kai thar Hull City pawh 'point hmuhna awlsam' ni tura ngaih ni mah se manager lailawk Mike Phelan-a hnuaiah an la chak ve ve bawk. Manchester City, Manchester United, Chelsea leh Hull City te chiah tun season Premier League-a 100% chak record nei an awm ta.

Pep pawhin mak ti

Stoke City khelmual Bet365 Stadium (a hming hmasa chu Britannia Stadium) hi mikhual team tana khelhṭhat harsatna a ni a, amaherawhchu Manchester City-in point thum hmu turin harsatna an nei lo.

Steaua Bucharest laka penalty vawi hnih hlahtu Sergio Aguero-a'n penalty spot aṭangin goal a khung tawh a, Argentine striker hian goal dang a khung belh bawk. Second half-ah Stoke-in Bojan Krkic-a penalty hmangin goal khat khung ve mah se City substitute Nolito-a'n hun tawp hma hretin goal hnih a khung.

Club pahnih penalty hmuhna hi a holam deuh hlekah a ngaih theih a, referee Mike Dean thutlukna dik tawk lo vanga City hi chak an ni lo. Pep Guardiola hoten inkhel thunun chungin hnehna an chang.

City boss Pep chuan, "Tun ṭuma kan khelh dan leh Bucharest-a kan khelh dan hi a ṭha takzet a, keipawhin hun rei lote chhunga hma kan sawn chak lutuk avangin mak ka ti zawk. Ka player-te'n theihna sang tak an nei a, an remhriat zia leh player
ṭha an nih zia an khelh dan hmangin min hmuhtir a ni," tiin a playerte'n theihna sang tak an neih thu a sawi.

Manto nge nge

Zlatan Ibrahimovic-a'n Old Trafford-a Premier League match a kheh hmasak berah goal hnih a khung a, harsatna nei loin Southampton 2-0 in an hneh. Swedish striker hian captain Wayne Rooney siam sak chu a lenna chhawr ṭangkaiin a tauh lut a, goal hnihna hi Luke Shaw penalty hlawhchhuah aṭanga a khung a ni.

Zirtawpni zana sawi zui hlawh erawh khawvel player manto ber Paul Pogba a ni a, French midfielder khelh dan thlirin United-in a lakluh nana pound maktaduai 89 lawih an seng ngam hi an lawm hle ang. Borussia Dortmund aṭanga United zawmtu Henrikh Mkhitaryan pawhin minute 76-naah Juan Mata thlakin Old Trafford-a inkhel entu mit titlaitu pakhat a ni.

Portuguese manager Jose Mourinho chuan, "A ball vawi khat khawihna tisualin kan lamah goal phah ṭep mah se a buai phah lo. Pogba kha a hmuhnawmin a ṭha lawr lak a ni," tiin a player thar a fak. France-in Euro 2016 final-a Portugal an hneh loh
ṭumin Pogba hian 11.2 km zet a tlan a, ani aia tlan tam player pahnih chiah an awm. United boss chuan, " Minute 30 dang pawh khelh la ṭul se ṭha takin a khel thei ang," tiin a fitness ṭhat thu a sawi lang.

Sawi hlawh Costa

Watford-in Etienne Capoue hmangin minute 56-naah hma hruai mah se Cesc Fabregas luh hnuah inkhel a danglam. Substitute Michy Batshuayi-a'n minute 10 chiah a awm tawh tihin Blues tana a goal hmasa ber a khung a, minute sarih hnuah Spanish midfielder Fabgregas siam chu Costa-a'n chakna goal khung nan a hmang.

Vicarage Road-ah Chelsea forward Costa chetdanin sawi zui a hlawh leh a, Spain international striker hian Watford-in goal an khung zawhah yellow card hmuin hemi hnu minute 10-ah tluk der vangin yellow card vawi hnihna hmu tur ni mah se referee Jon Moss-a'n card a phawrh tawh lo. Costa hian chakna goal a khung zui a, Blues forward hian West Ham an hneh
ṭumin hnawhchhuah theih dinhmuna a din hnuah chakna goal a khung tawh bawk.

Chelsea-in point thum an hlawhchhuah theih nan Antonio Conte-a'n substitution awmze nei a siam a, bench ṭanga lut Victor Moses, Batshuayi leh Fabregas te an chakn kawngah an ṭangkai hle. Blues boss Conte chuan, "Watford kan hneh avang hian inrintawkna kan ngah sawt ang. First half-ah khan kan khel ṭha lo ngei a, kan tihsual pawh ka hre lo. Chutihrualin ka sawi nawn duh chu kan league khelh hi a harsa a ni," tiin coach rorum chuan sawi.

Hull an phur

Coach Steve Bruce ban vang leh player inhliam tam vangin kai thar Hull City hi relegate lehnghal tura ngaih an ni a, amaherawhchu khualmuala Swansea City an hneh leh avangin match hnih lekah point ruk an hmu der tawh. Swans hian an mualah inkhel thunun mah se Tigers-in hun tawp dawn hnaiha substitute Shaun Maloney leh Abel Hernandez te goal hmangin hnehna an chang.

Hull manager lailawk Mike Phelan chuan, "Thudik tak sawi chuan player kan la ngah tawk lo a, amaherawhchu kan rilru huaisenna leh kan khelh ṭhat vangin hma lam kan pan zel a ni," tiin a sawi.