Spurs-in Bale lak let an tum

Real Madrid forward Gareth Bale-a'n chanchin ngaihnawm a nei leh ta a, Welsh international hi amah chher liantu Tottenham Hotspur chuan lakluh tumin an dawr mek.

Bale hi season hman zawh hlim kha chuan a agent Jonathan Barnett chuan a chhuah loh tur thu a lo sawi tawh a, khel phak lo chunga Real-a cham tur anga sawi a ni hian mak tih a hlawh hle. 

Mahse, September-a thlen meuh chuan Barnett pawhin a thusawi a thlak tawh a, Bale-a agent chuan, "Gareth hian Spurs a la hmangaih reng a, a awm duhna hmun pawh a ni," tiin a player leh Spurs indawrna chungchang a sawi a, a hnai tawh hle tihna a ni. 

Premier League match hmasa bera Everton ngam lotu Spurs hian Real Madrid left back Sergio Reguilon chu an dawr bawk a, kum 23 mi defender pawh hi Spurs tan a khelh ngei hmel. 

Real Madrid-a Gareth Bale chanchin hi thawnthu ngaihnawm ber pawl a tling a, European football expert-te pawhin rei tak chhung chu chaw tui bera an neih a ni tawh. 

Hliam vanga talbuai ngun ve tak Bale hi Zinedine Zidane-a'n Real Madrid-a enkawl hnuin Santiago Bernabeu-ah hian a tla tlum lo a, kum 2019 nipui laia pre-season tournament an neih ṭumin Zidane chuan Bale hi chhuak se an vaia ṭhat tlanna tur a nih thu a sawi hial!

Bale-a chhuah theih thu ualau taka sawi a nih hnuah Chinese Super League club Jiangsu Suning an lo lang a, anni hian European football anga inelna hautak hmachhuan tur nei lo mah se pawisa an nei thung - Bale hi kar khata pound maktaduai khat hlawh tir an inhuam. 

Welsh forward-in China a pan tawh mai dawn nia a lan hnuah Real-in an rilru thlakin Bale chhuah an phal lo a, khelmualah an chhawr duh tak tak bawk si lo - season tluanin Bale-a'n kawhmawh a bawl a, he chanchin erawh inhrilh thui ngai loa kan hriatsa vek a ni. 

Bale hian kum 2013 khan Spurs aṭangin Real Madrid hi pound maktaduai 85 ngawtin a zawm a, a hunlaia khawvela footballer manto ber a ni - Spanish club-ah hlawhtlinna ropui tak chharin Champions League nomawi pali a chawi a, La Liga-ah vawi hnih a champion bawk. 

Kum 31 mi forward hian Real-ah hian kar khatah  £600,000 a hlawh mek a, Santiago Bernabeu-ah ani aia hlawh hnem player an awm lo - hei tak hi Spurs tan buaina a ni thei ang em, tih chu zawhna lo piang a ni. 

Khawthlang media-ten an tarlan dan chuan Spurs hian Bale hi loan-a lakluh tumin an dawr phawt a, loan-a an lalut thei a nih chuan Real-in a hlawh chanve tal an pek a ngai thung ang. 

Bale-a hlawh chanve pawh hi Spurs ang club tan chuan thil tam tham tak a la ni cheu a, Tottenham-a an player hlawh hnem ber ni mek Harry Kane hian kar khatah £200,000-a hlawh. 

Spanish media ten chiang taka an tarlan chu Real hian an club-a kum hnih chhung contract la nei Bale hi chhuahtir ngei an duh a, kum hnih chhunga a hlawh tur  pound maktaduai 35 vel a thlawna sen reng an duh lo. 

Bale-a agent Barnett hian, "Gareth hi khawvela player ṭha ber pawl a ni a, khawvela player ṭha ni phakte chu loan-in an chhuak ngai lo," tiin lo sawi tawh mah se loan-a Spurs a panna mai chance hi a sang hle. 

Loan-a a chhuak kher lo a nih pawhin Real hian Bale an chhuahtir vanga an sum hum tur zat an ngaihtuah ang a, a thlawna chhuahtir hial pawh an hnial lo ang - Spurs tan man nei loa Bale lakluh a, hlawha insen deuh hi hlawkna ni zawkin a lang. 

Chutihrual chuan Bale duhtu zingah hian Manchester United an tel ve tih hriat a ṭha a, Red Devils hian hlawh lamah an inhuam thui viau a nih chuan Bale hian Old Trafford lam a pan thut mai thei bawk. 

Khawthlang media ṭhenkhat chuan United leh Bale an inrem tawh hial angin an tarlang a, hei erawh he thu buatsaih thleng hi chuan a dik tawk lo deuh niin a lang. 

United hian Bale lakluh hi an duh ngei a, mahse an duhthlanna hmasa erawh Borussia Dortmund star Jadon Sancho a ni. Red Devils hian Sancho an lakluh theih loh chauhin Bale hi lakluh an tum. 

Chutihrual chuan United hian Sancho hlawh leh agent fee thlengin inremna mumal tak nei tawh mah se Dortmund nen ber hian an thu a la inhmu thei lo a, hei hian United transfer duh angin a ti kal chak thei lo. 

German club hian Sancho hi an hnena a cham tur thu sawi chiang tawh mah se indawrna a la kal reng tih erawh hriat a ṭha a, chutihrual chuan Dortmund pawisa duh zat pound maktaduai 110 hi United tan a 

tam hret. 

Spurs-in Bale lakluh an tumna kawngah Dele Alli chhuah an phal dawn niin The Telegraph chuan a tarlang a, English midfielder hian a nghet ni loin loan-a Spanish club-a zawm an phal niin an sawi. 

Real hian Alli hi loan in an la a nih chuan a hlawh £150,000 chu 100% an pe ang a, Spurs-in loan-a an hawh Bale-a hlawh 50% an tum bawk ang tih a ni - Spurs tan Bale-a hlawh pek a awlsam sawt dawn tihna a ni. 

Hei erawh thuthang mai a ni a, khawthlang media-te hian huai takin thu an ziak ṭhin tih hriat tel a ṭha. Chutihrual chuan Spurs leh Bale hi an indawr ngei tih erawh a agent pawhin a sawi chiang tawh a, hemi bik hi chu thuthang satliah a ni lo. 

Spurs hian zanin dar 9:30-ah Europa League second qualifying round an khel dawn a, khualmualah Bulgarian club ṭha Lokomotiv Plovdiv chu an 

lenchilh ang.