LZ-a'n goal a khung ve leh ta

Tun season-ah beisei a phak lo tia sawi hlawh Lallianzuala Chhangte-in a thiam a la theihnghilh lo a, Indian Super League-ah Pathianni zan khan goal a khung leh ta.

Mumbai City hian I League champion Mohammedan SC an mikhual a, 3-0 in chak mah se goal erawh kan hmu har hle. Minute 72-naah Mohammedan defender Gaurav Bora chuan Bipin Singh-a cross chu tauh chungin an keeper a pass a, mahse, goalkeeper Padam Chhetri a lo tlan chhuah bawk si avangin an lamah a lut daih.

Minute ruk hnuah LZ-a'n a khung ve leh nghal - Lunglei tlangval hian Jon Toral-a siamsak chu inngaihtuah buai loin goal-ah a pet nghal a, net a tawn puar chiang hle. Thaer Krouma chuan Mumbai tan khung ve lehin, mualneitu team an chak chiang.

Lallianzuala Chhangte tan tun season ISL-a goal thum a khungna chiah a ni a, Mumbai captain hian league match 16 a khelh aṭangin assist vawi hnih a nei tawh bawk - playoff chhiar tel lohin league match sarih khelh tur an la nei a, fan-ten 'Mizo Flash' hming lem an vuah forward hnen aṭangin goal tam zawk hmuh belh an beisei ang.

Mumbai tan hian LZ-a bakah defender Hmingthanmawia Ralte (Valpuia) chuan inkhel bul a ṭan a, Mohammedan tan Joe Zoherliana, Vanlalzuidika Chhakchhuak leh Lalremsanga ten inkhel bul an ṭan bawk.