Hmeichhe footballer man to ber Girma

Chelsea chuan hmeichhe football lamah pawh sum an theh chhuak hnem zel - USA defender Naomi Girma chu hmeichhe footballer man to ber ni turin San Diego Wave aṭangin an lei chhuak a, £900,000 (nuai 970.63) an inseng.

Kum 24 mi defender hian kum 2029 nipui thleng atan Women's Super League (WSL) ah hian contract a ziak a, Chelsea hian nikum lama American club Bay FC-in record an siam chu an khum a ni.

Bay FC hian nikum February khan Madrid CFF aṭangin Zambian forward Racheal Kundananji chu £685,000-a leiin, hmeichhe football-a player man to ber record an siam a, mahse, tunah chuan Chelsea-in an khum ta.

London club hian January 2024-ah khan Levante aṭanga Mayra Ramirez lakluh nan £384,000 an lo seng tawh bawk a, a hun laia hmeichhe footballer man to ber record an lo siam tawh.