Spurs ngamtu Vardy awmna Foxes

Pathianni zan Premier League inkhelah Leicester City chuan Tottenham Hotspur chu 2-1 in an hneh a, goal khungtu Jamie Vardy chet dan chu Spurs ṭantute tan a lawmawm loh khawp ang.

Tottenham Hotspur Stadium-a inkhelah Richarlison chuan chawlhlawk hma hretin goal a khung, second half-ah Vardy hmanga an sut bakah Bilal El Khannouss chuan chakna goal a khung bawk.

Bobby De Cordova-Reid-a cross chu goalkeeper Antonin Kinsky chuan a lo chingfel thei lo a, hnai tak aṭangin Leicester captain Vardy chuan a khung, goal a khung hnu hian a jersey bana EPL badge chu a kawk a ni.

Nikum August thla khan Vardy hian Spurs an hmachhawn ṭumin a lo ti tawh bawk - Foxes hian Premier League nomawi pakhat an chawi tawh, an khingpui North London club erawh an la champion ve lo thung.

Foxes manager Ruud van Nistelrooy chuan, "Vardy hi kan tan chuan hruaitu ṭha tak a ni, a khelhpui te mai bakah coaching staff thlengin kan zah. Khelmual chhung leh a pawnah hruaitu ṭha a ni tel bawk.

"Spurs lakah pawh hruaitu ṭha a nihna chu a takin a lang, chawlhlawk lai khan goal kan phurh avangin player naupang zawkte chu an ngui hle, khatiang hunah tak khan Jamie hi kan mamawh, ani chuan a mawhphurhna ṭha takin a hlen," tiin a sawi.

An chak avanga Foxes an lawm aiin Ange Postecoglou erawh a dinhmun a derthawng thung - Spurs manager hian tun hmain a team enkawl tawhte chu season hnihnaah a champion pui mai ṭhin, tunah erawh beisei an phak lo hle.

Tottenham hi team ṭha dangte el phak tura ngaih an nih laiin Premier League table-ah 15-na an ni mek, an tan champion sawi ngam a ni lo - season thara Champions League khelh pawh beisei ngam chi a ni tawh lo, insiamṭhat an mamawh takzet.