Inter Milan chesual duh lo

Serie A champion lai Inter Milan chuan an nomawi hloh mai an tum lo - Pathianni zan khan an mikhualna ramah Lecce chu 4-0 a sawpin point thum an hlawh chhuak.

Inter Milan hian Serie A match 21 aṭangin point 50 an hmu, hmahruaitu leh an chunga awm Napoli an phak lohna chu point khat a ni, khelh hmabak pakhat an la neihah an chak a nih chuan a chung berah an awm thei ang.

Simone Inzaghi-a'n hliam vangin a duh ang thlapin a naute a rem hleithei ṭhin lo a, chutihrualin team nghet tak a neih tawh avangin buaina lian tham erawh an tawk lo - player pali ngawtin goal khat ṭheuh an khung a ni.

Davide Frattesi-a'n goal hmahruai khungin striker ṭha Lautaro Martinez chuan a zui a, defender goal khung thei tak Denzel Dumfries inlar zuiin an goal hnuhnung ber chu Mahdi Taremi-a'n penalty aṭanga a khung a ni thung.

Inter Milan manager Simone Inzaghi chuan, "Team dang nena kan inelna chungchang zawhna hi ka dawng hnem. Napoli leh Atalanta ten season an hmang ṭha hle a, team hlauhawm leh ṭha tak pawh an ni.

"Team ṭha pahnih dangte ang bawk hian keini pawh kan ṭha tawk, chiang taka ka sawi duh chu kan elpui zingah hlauh kan nei lo, kan hmaa tih tur awm chu kan hlen chhuak zel ang.

"Thla khat chhung chu ka naute hian ni thum danah match an khel reng a ni a, an taksa pawh a chau tawh hle. Chutiang kara kan chak dan hi a lawmawm lai chu a ni," tiin a sawi.

Inter Milan hian Nilaini zanah Champions League khel turin AS Monaco an mikhual dawn, kar tawpah AC Milan nen Serie A match hautak leh boruak sang an khel zui leh bawk ang.