Brentford an chak ve ta

Premier League match hnih a zawnin Manchester City leh Liverpool an mikhual a, Brentford an tlawm ve ve - Thomas Frank-a naute tan a harsa tih a chiang.

Mahse, Pathianni zan khan Crystal Palace chu khualmualah an lenchilh a, league match nga a zawna tlawm lo tawh Palace hi khualmualah 2-1 in an hneh.

Selhurst Park-a inkhelah hian goal erawh kan hmu har hle. Minute 66-naah Brentford vanneihna a her chhuak a, Palace centre back Maxence Lacroix chuan Nathan Collins titluin penalty a chawi.

Season duhawm tak hmangtu Bryan Mbeumo a lo pen chhuak a, a pet hmasak hi a chhuih goal lo - post a pet per a, hei hi Marc Guehi chuan a lo pet chhuak hman.

Mahse, video assistant referee (VAR) a inrawlh a, Palace captain Guehi hi penalty pet a nih hmain a lo tlan lut hman a, pet ṭhat a ni - Mbeumo-a'n a hlah nawn tawh lo a, goal-ah a chantir.

Kum 25 mi Mbeumo hian tun season-ah league match 23 khela goal 14 a khungna chiah a ni a, assist vawi thum a nei tel. Cameroon international hian a career-a top flight league-ah heti zat goal a la khung ngai lo.

Brentford-in an la duhtawk mai lo. Kevin Schade chuan Mikkel Damsgaard-a cross chu tauh lutin, an goal hnihna a khung a, minute 80-na a nih tawh avangin chak tur a chiang tawh tiin a sawi theih.

Mahse, hun tawp hnaih lamah Palace-in Bees thinphu an tirang a, player thar Romain Esse chuan a club thar tana a match hmasa berah goal khungin si phurh a sut ṭhen - minute 85-na a ni tawh a, goal dang a lut zui lo.

Esse hi kum 19 mi lek a la ni a, January 18 khan Championship club Millwall aṭangin Palace hi a zawm a, English attacking midfielder man hi pound maktaduai 14.5 thlenga sang chho thei tur a ni. Tun dinhmunah chuan a man a phu rih!

Palace-in mahni mualah Brentford an ngam lo a, an chance neih an chhawr loh chu an ui thar ang - Jean-Philippe Mateta hun ṭha neih chu Brentford keeper Mark Flekken chuan ṭha takin a dansak a, Eberechi Eze chuan free kick hmangin post a tihper bawk.

Brentford-in goal an khung piahlamah chance erawh an nei ve tho a, Keane Lewis-Potter-a hun duhawm tak chu Palace keeper Dean Henderson-a'n ṭha zetin a dang - a tawpah Brentford an chak a, tun season-a khualmuala league match an chak vawi hnihna chiah a ni.