A harsa dawn tih kan hria - Enrique

Paris Saint Germain manager Luis Enrique chuan Ligue 1 nomawi humhim chu thil awlsam a ni dawn lo tih a sawi a, season chawhnu lamah match hautak an ngah avangin a hautak dawn tih a sawi bawk.

Ligue 1 champion PSG hi Pathianni zan khan an mikhual Reims nen 1-1 in an inhnehtawk - Ousmane Dembele goal khung chu Keito Nakamura chun sutin point an insem, khelh zat inangah Paris club hi anmahni hnaih bertu Marseille aiin point 10 zetin an la sang zawk.

PSG manager Enrique chuan, "Champions League khelh hma leh khelh hnu chiaha match dang neih hi chu engtik lai mahin a awlsam ngai lo - Reims nena inkhelh pawh hi a harsa dawn tih kan hre lawk a, a harsa hle bawk a ni.

"Goal kan khung a, chumi hnu lawka kan chhuah leh kha a pawi lai chu a ni. Tunah chuan kan hahchawl zeuh ang a, kan match lehpek atan rilru kan seng zui leh nghal ang," a ti.

Paris club hian Manchester City an hneh hnuah Reims nen an inhnehtawk a ni a, tunah chuan Nilaini zana VfB Stuttgart nen a UCL match pawimawh an khelh tur atan rilru an sen a ngai nghal ang.

PSG hi UCL team 36 zingah 22-na an ni mek, playoff khel phak tlang tur chuan tlawm a thiang lo - club neitu lamin an duh ber European title nei turin thapui an thawh a ngai dawn a, an theihna zawng zawng an hlan ang.