Whyte leh Povetkin inhnek leh dawn

British boxer lar Dillian Whyte chu November 21 khian Alexander Povetkin nen an inhnek leh dawn a, boxer pahnih intawn hmasakah Russian boxer Povetkin hian hnehna a lo chang tawh. 

August 22 khan boxer pahnih hi an intawng a, Whyte hian inhnek thunun zawk mah se round nganaah Povetkin hian a knockout a, world title fight a beiseina pawh a thamral nghalah ngaih a ni. 

Mahse, boxer pahnih hian an inhnek hma khan an contract-ah rematch neih theih turin an lo ziak tel a, he contract hi Whyte chuan remchangah lain Povetkin hi a hmachhawn leh thei dawn. 

Promoter Eddie Hearn chuan, "Whyte tan chuan hnehna chan ngei ngei a ngai tawh ang," tiin boxer pahnih inhnek tur chungchang hi a sawi a, inhnekna tur hmun erawh puanzar a la ni lo. 

Hearn chuan inhnek chu a hmunah entu an awm thei lo a nih pawhin kaltlangpui a nih tur thu a sawi a, UK sorkar nen entu an awm theihna turin indawrna a kal mek thu a sawi bawk. 

Kum 32 mi Whyte hian vawi 29 inhnek hmachhawn tawhin vawi 27-a chak a, vawi hnih a tlawm - a khingpuite hi vawi 18 zet a knockout thei a, WBC interim heavyweight title chu July 2019 aṭanga Povetkin laka a hloh hma thleng khan a kawl. 

Povetkin hi kum 41 mi niin vawi 39 fight-a hmachhawnah vawi 36 hnehna a chang thei a, vawi hnih tlawm mah se vawi 25 ngawt a khingpui a knockout thei - WBA (regular) heavyweight title chu 2011-13 inkar khan a lo kawl 

tawh bawk.