Baggies-ah Chelsea defender hlui Ivanovic

Premier League kai thar West Brom chuan Chelsea defender hlui Branislav Ivanovic an lalut a, defender tawnhriat nei ṭha hian kum khat chhung atan contract a ziak. 

Kum 36 mi defender hian February 2017 khan Chelsea chhuahsanin Russian club Zenit St Petersburg-a zawm a, season thum leh a chanve a cham hnuin July thla khan a chhuahsan.

Serbia international hian hetih chhung hian Russian Premier League nomawi ṭum hnih a chawi a, Russian Cup-ah vawi khat an champion bawk. 

Chelsea-a season kua hun a hman chhung pawhin a hlawhtling hle. Blues tan inelna hrang hrangah match 377 khelin goal 34-a khung a, Premier League leh FA Cup-ah vawi thum ve ve champion-in Champions League leh Europa League nomawi a chawi bawk. 

Baggies boss Slaven Bilic chuan, "Premier League kai thar keini ang tan chuan player ṭha tak a ni a, kan tehna zawng zawngah a tling vek a ni. A career-ah tih theih zawng zawng chu a ti vek tawh a, kan lawm takzet. Khelmual chhung leh pawn thlengin kan ṭangkaipui dawn a ni," a ti. 

Ivanovic chuan, "Premier League hi khawvela league ṭha ber a ni a, chona inchhawp leh hi ka mamawh a, chumi atan chuan ka inpeih tawh bawk," a ti a, Premier League-a a lo kir leh thei chu a lawm thu a sawi bawk.