Villa tan Grealish a rinawm

Aston Villa captain Jack Grealish chuan Villa Park-a cham chhunzawm turin kum nga chhung atan contract thar a ziak a, "Ka club, ka in a ni a, he hmunah hian ka hlim em em a ni," tiin a sawi. 

Kum riat mi lek a nih laia an khaw club Villa zawmtu English midfielder hi player thiam bik a nih avangin chhuak tur anga sawi thawm a ri ring hle a, mahse amah chher liantu club-a cham chhunzawm a thlang ta zawk a ni. 

Villa chief executive Christian Purslow chuan, "A kianga khel tura team ṭha tak din kan duh a, contract thar ziak a, a club hmangaih em em tana a inlan hian min ti hlim takzet a ni," a ti. 

Kum 25 mi Grealish hian season hman zawh takah khan Villa tan inelna hrang hrangah match 41 khelin goal 10 a khung a, assist vawi riat a nei. Premier League-a an inham tan nan a pawimawh hle. 

May 2014-a Villa tana a match hmasa ber khel ve chauh Grealish hian Birmingham khaw club tan hian inelna hrang hrangah match 187 khel tawhin goal 26-a khung a, season hmasa kha a mimal season ṭha ber a ni.