2024 Olympic thlen dil tur Paris

France khawpui Paris chuan kum 2024 Olympic thlen dil a tum. Paris khawpui hian 2024 Olympic hi an thleng thei a nih chuan kum 100 hnua infiammite fuankhawmna Olympic an thlen lehna hmasa ber a ni ang.

Khawvela khawpui lar tak Paris hian 2012 Olympic kha thlen tumin an lo bei tawh a, mah se London khawpui khing zo loin an hlawhchham. Kum 2008 leh 1992 khan thlen an lo dil hlawhchham tawh bawk.

Paris khawpuiin Olympic an thlen theih­na tura hma latu pawl chairman Bernard Lapasset chuan, "2024 Olympic thleng tura kan beihna hian Paris khaw mipuite a ti lawmin a ti hlim ang tih ka ring tlat a, he khua hian inlungrual zawka ke kan pen theih phah pawh ka ring tlat a ni," a ti.

Kum 2016 Olympic chu Brazil a khawpui pakhat Rio de Janeiro-in a thleng dawn a, 2020-ah Japan khawpui Tokyo-in a thleng dawn thung.

French national Olympic committee pre­sident Denis Masseglia chuan, "He hun hi kan tan chuan kan hnam tih dan phung leh culture zau tak tarlanna remchang leh he hnam infiamna khawvel hriata tarlanna hun ṭha tak a ni," a ti.

Paris khawpui hian Olympic 2024 thlen dilna hi International Olympic Committee hnenah September 15 thleng thehluh theihna hun an nei a ni.