Hmeichhe World Cup Champion nomawi chawi nawn tum Japan

Hmeichhe World Cup champion lai Japan-in an champion nomawi hum­him turin hmalam an pan zel a, Thawhlehni zan khan quarterfinal lut turin Nether­lands chu 2-1 in an hneh a ni.

Inkhel ṭan aṭanga minute 10-na lekah Japan-in goal an khung nghal a, Yuki Ogimi ball tauh crossbar per lo let lehlam chu Saori Ariyoshi-i'n an hmahruaina goal ni turin a pet goal.

Japan-in Netherlands tlarhnung chhaihbuai chhun­zawm mah se a pawimawh ber goal an khung thei lo a, goal dang lut loin chawlhlawk an hmang.

Second half-ah Japan-in an thawhrim rah an seng ta nge nge a, Mizuho Sakaguchi chuan minute 78-naah an goal hnihna a khung. Netherlands hmeichhe team an beidawng duh lo, minute 90-naah Kirsten van de Ven chuan a lu hmangin goal khat a rawn sut. Mahse, Netherlands an harh tlai a, hun a tawp zui avangin an chak lo.

Japan hian Inrinniah Australia chu quarterfinal an khelhpui ang.

Netherlands tan World Cup champion beiseina a tawp mai a ni lo a, an chak loh avang hian nakum Rio Olympic-ah an inlan thei lo mai thei. Rio Olympic-ah hian Europe hmeichhe team ṭha pathum chu qualifier khelh ngai loin an tling dawn a, World Cup second round aṭanga an tlak avang hian Netherlands hi Europe hmeichhe team ṭha pathum zingah an lang pha tawh lo.

Rio Olympic khel tur chuan European play-off an khelh a ngai tawh dawn a ni.