Chhiah awl ruk vangin Leeds United neitu pawisa chawitir

Premier League club lar tak ni ṭhin Leeds United neitu Massimo Cellino chu chhiah a lo awl ruk avangin Italian court chuan £28,500 chawi turin a hriattir.

Kum 58-a upa Cellino hi USA aṭanga a car lei Range Rover VAT a pek loh avangin hrem a ni. Cellino hian chanchin duhawm lo a ngah hrim hrim a, thla hmasa lawk khan chhiah thubuai vang thoa thla li lai hrem a nih hnuin Leeds Board-ah a let ve leh chauh a ni.

Football League lam chuan Cellino-a thubuai vang hian engtiangin nge hma an lak dawn an la sawi lo a, court thutlukna hi official-a puanchhuah an nghak phawt dawn nia sawi a ni.

Serie A club Cagliari neitu hlui Cellino hi nikum December thla khan Football League hruaitu te chuan club neitu nihna leh director te hmai a ti bal a ni tiin a chhiah pek ṭhat loh vang bawkin an lo hrem tawh a ni.

Italian sumdawng hausa Cellino hi a sum­dawnna lawngin sumdawnna bungrua an lakluh chungchangah chhiah awl ru a puh a ni bawk a, an puhna hi October thlaah Italy Court chuan a ngaihtuah leh dawn a ni.