Swansea-ah goalkeeper thar

Swansea City chuan Sweden international goalkeeper Kristoffer Nordfeldt chu Dutch club Heerenveen aṭangin an la lut a, an inremna zat erawh tarlan a ni lo.

Kum 26-a upa Nord­feldt hian Premier League club-ah hian kum thum daih contract a ziak. Liberty Stadium-ah hian goalkeeper Lukasz Fabianski a lo awm sa tawh avangin palyer pahnih te hian hmun chan tumin an inel a ngai ang.

Welsh club Swansea hian Nordfeldt an lak luh hma hian an goalkeeper pahnih Gerhard Tremmel leh David Cornell te chu an lo chhuah tir tawh thung.

Sweden international chuan, "Swansea club hi chhungkaw lian tak ang mai a ni a, an hmathlir leh ka ngaihdan a inmil avangin he hmun hi ka rawn pan. Premier League ka khel ve tur hi ka lawm em em a ni," tiin a sawi.

Tun nipui bazar chhung hian Swansea hian player pahnih an lo la lut tawh a, Ghana forward Andre Ayew chu Marseille aṭanga an lak bakah French defender Franck Tabanou chu St-Etienne aṭangin an lo la lut tawh bawk.

Swansea hian Barce­lona keeper kum 18 chauh a upa Guillermo Lara chu U21 player turin lakluh an tum mek bawk a, inbiak na neih mek a ni.

Inrinni khian sea­son thar inbuatsaih nan Swansea hian Cham­pionship club Nottingham Forest chu friendly match an khelh pui ang.