Twenty20 cricket England-in New Zealand an sawisa

ICC World Cup an chet chhiat hnua an harh tharna chan England-in an chhunzawm zel a, ODI series-a an hneh hnu New Zealand chu Twenty20 match-ah run 56-in an hneh.

Old Trafford-a inkhelah hian bat hmasa zawkah England an ṭang a, over 20-ah run 191 vaw chhuakin mi pasarih an out.

England tan Joe Root-a'n a thawhhlawk a, kum 24-a upa batsman hian ball 46 a hmachhawnah run 68 a vaw chhuak.

New Zealand bat hun a thleng a, over 16.2-ah an vaia out vekin run 135 an tlin hram. Black Caps tan Kane Williamson chuan ball 37 a hmachhawnah run 57 zet vaw chhuak mah se a team te'n an thlawp ṭha tawk lo a, New Zealand an tlawm.

England bowler zingah David Willey a che ropui a, run 22 chiah pein wicket thum a la. Mark Wood-a'n Twenty20 match a khelh hmasak berah England squad-a a lan phak chhan tilangin wicket thum a la bawk.

ICC World Cup 2015 finalist New Zealand-in England tour-ah beisei an phak lo hle. Test series-ah 1-1 in an inhnehtawk a, ODI series-ah England in 3-2 in hnehna an chang thung. An mualpho lutuk tur thup nan Twenty20-ah chak ngei tum mah se an mualpho leh ta a ni.