Napoli-ah Pepe Reina a kir

Bayern Munich chhuahsanin Pepe Reina chuan Italian club ṭha Napoli a zawm. Kum 2013-2014 season khan Reina hian Liverpool aṭangin loan-in Napoli tan a lo khel tawh, a vawi hnih nan Stadio San Paolo-ah a kir leh ta a ni.

Italy-a season khat hun a hman chhung hian vawi 43 zet inlan hman mah se nikum khan German champion Bayern-ah a kal. Mahse manger Pep Guardiola hnuaiah khelhna hmun a chang ngai lo, first choice Manuel Neuer thachhang dawltu niin vawi thum chiah khelmualah a inlan.

Napoli hi season hmasa a an manger Rafael Benitez-a'n Real Madrid a pansan avangin manager thar atan Maurizio Sarri an la lut. Reina hian Bayern-ah contract nei mah se khelhna hmun a chan loh avangin hmun a chan theih a inbeisei na pan a dil a, he a dilna hi club thuneitu ten an remtih sak.

An club website-ah thuchhuah siamin Bayern deputy chairman Jan-Christian Dreesen chuan, "Pepe hian inkhelh a duh avangin hmun a chan theihna tur hmun pan dilna a rawn theh lut a, he hi kan lo pawm sak. Kan bulah khan hun hlimawm tak a hman ngei kan beisei, a ni leh a chhungkua te an kal leh zel na turah duhsakna kan hlan e," tiin a sawi.

Spanish goalkeeper hian Liverpool-ah kum kua hun a hman chhungin FA Cup, League Cup leh UEFA Super Cup te a chawi hman. Spain tan vawi 33 a lo inlan ve tawh bawk.