Reguilon-a'n Spurs a pan hnai

Manchester United pawhin lakluh tuma an hel mek nia an sawi Sergio Reguilon chu Spurs-in an lalut hnai a, kum 23 mi left back hi Liverpool pawhin an lo thlithlai tawh defender kha a ni. 

Italian journalist lar leh rintlak Fabrizio Romano chuan Reguilon man atan hian Spurs chuan euro maktaduai 30 pek an remti tawh niin a sawi a, Spanish defender hian hlawh leh contract rei zawng lamah London club hi inremna a neihpui tawh bawk. 

Romano-a tarlan danin Spurs leh Reguilon hian lehkhaa inremna ziahfel chiah an hmabak tawh a, he thuziak i chhiar meuh chuan an inlalut fel tawh hial mai thei. 

Real Madrid youth system chhuak defender hian Real senior team tan 2018-19 season khan a match hmasa ber a khel ve chauh a, inelna hrang hrangah match 22-a inlan. 

Season hman zawh takah khan Sevilla-ah loan-a kaltir niin inelna hrang hrangah match 38-a khel a, goal thum a khung - Spanish club tan hian Europa League nomawi a chawi. 

United hian Spurs hmain Real hi Reguilon chungchangah hian an dawr a, mahse Spanish champion hian lei let theihna dan nei tura buyback clause ziah tel an duh. 

Red Devils lam hian Real phut anga inlei hi an duh loh avangin an inhnukdawk a, Spurs zawk hian an lalut dawn ta a ni.