Saudi lamin Vini an ngam huai!

January 2025 a ral dawn a, Saudi Arabia thawm a na leh ṭan - Spanish chanchinbu lar AS chuan Saudi lam hian Vinicius Junior lakluh an tum dawn niin an sawi a, sum pawh an theh chhuak huai hle.

Saudi lam club, a hming tarlan loh chuan Vini hi euro maktaduai 300-a lakluh an inhuam a, kum nga chhung, kum tin euro maktaduai 200 hlawhtir an inhuam bawk - euro tluklehdingawn khat a hlawh hman dawn tihna a ni.

Vini hian heti zat hian Saudi lam hi pan ta se, khawvela footballer man to ber ni mek Neymar-a man zat a khum ang. Neymar-a'n Barcelona aṭanga Paris Saint-Germain a pan khan a man zat chu €222mtd a tling.

Thlatir khan Saudi Pro League CEO Omar Mugharbel chuan, "Nipuiah hian player hraw leh langsar tak tak lakluh kan tum a, Vinicius chungchang pawh kan la ngaihtuah ang chu," tiin a lo sawi tawh.

A thiamna piah lama khelmual pawna thawm nei ve reng Vinicius hian tun season inelna hrang hrangah Real Madrid tan macth 26 khel tawhin, goal 16 a khung tawh a, assist vawi 10 a nei bawk.

Brazil international hian a club khelhna Real Madrid chu La Liga table chung berah awmpuiin, pahnihn Atletico Madrid aiin point liin an sang mek.

Champions League lamah pawh playoff khel turin an tling chiang tawh a, zanin dar 1:30-ah anmahni ang thoa tling chiang tawh Brest chu khualmualah an lenchilh ang - an chak chuan top 8 nih theihna kawng a la awm.