Liverpool-in Hato rim lo

Premier League leh Champions League hmahruaitu Liverpool chu Ajax centre back Jorrel Hato nen sawizawm ni mah se, Reds hian Dutch defender hi lakluh tumna an nei lo niin a hrechiangte chuan an sawi.

Kum 18 mi Hato hi a kum naupang anga en chi a ni lo. Ajax tan tun season-ah match 31 a khel der tawh a, Reds-in Anfield-a Ipswich Town an sawp kha a hmunah a en avangin sawizawm an ni leh nasa zual.

Mahse, Dutch chanchinbu De Telegraaf chuan Hato hian a ṭhianpa Ryan Gravenberch sawmna pawmin, a ṭhianpa hi a tlawh ve mai niin an sawi. Reds hian nipui transfer-ah erawh Hato hi an rim mai thei.

Netherlands tana vawi nga inlan tawh defender hian Ajax-ah kum 2028 thleng contract neiin, a man hi euro maktaduai 30 bawr vel ni tura ngaih a ni a, Arsenal, Real Madrid leh Chelsea ten an duh bawk nia sawi a ni.

Liverpool hian zanin dar 1:30-ah Champions League match khel turin PSV Eindhoven an lenchilh dawn a, Reds hian last 16 lut chiang tawhin, Dutch club lakah an tlawm lo a nih chuan table chung ber luah chungin league stage an khar thei ang.