Villa-in Duran chhiar to

Aston Villa chuan an striker Jhon Duran chu a chhuak dawn a nih chuan man tlawm taka chhuahtir an tum lo a, Colombia international manah hian pound maktaduai 80 an phut niin khawthlang media-te chuan an tarlang.

Villa hian Duran bakah striker Ollie Watkins an nei tel a, player pahnih hi form ve ve mah se, coach Unai Emery-a'n English striker Watkins lam hi a hawi mah zawk - hei vang hian Duran hi chhuak thei reng dinhmunah a ding.

Mahse, English club hian man tlawm taka chhuahtir erawh an phal lo a, kum 21 mi striker hi kar hmasa lawk khan West Ham chuan 57mtd-in dawr mah se an phalna zat a tling lo.

Duran hian tun season inelna hrang hrangah match 29 khelin goal 12 a khung a, bul a ṭan tam loh avangin a minute khelh zat hi 1043 chiah niin, minute 87 dana goal khung ziah ang a ni.

Villa hian zanin dar 1:30-ah Champions League match khel turin Celtic an mikhual dawn a, hnehna an chan chuan inkhel dang result a zirin direct-a last 16 luh theihna dan an nei - an tlawm a nih pawhin playoff erawh an khel chiang tawh.