Ka ṭha tawk lo a ni - Zverev

Grand Slam champion nih tum viau ṭhin mah se a ti hlawhtling thei lo a, inelna liana champion turin Alexander Zverev chuan a ṭha tawk lo niin a sawi, hma hun erawh thui tak a la nei thung.

Australian Open 2025 khelh zawh takah khan Zverev hi a khel ṭha hle, mahse nomawi inchuhna inkhelah erawh Jannik Sinner lakah set a la miah lo, straight set hmangin a chak lo zawkah a ṭang a ni.

German tlangval Zverev chuan, "Thui deuha sawi theih a ni a, tawi leh awlsam taka sawi dawn chuan keimah hi ka ṭha tawk lo a ni. Tun dinhmunah chuan Jannik kha khawvela a ṭha ber a ni rih a, a lakah ka ding zo lo.

"Champion tum khan ka theihna zawng zawng ka hlan a, khatiang hun tawng tur khan ka thawkrim em em bawk. Tun hnua ka ngaihtuah let pawh hian inbuatsaihna ka neih dan zawng zawng te kha a ṭha tawk viau, mahse ka hun a thleng thei si lo," a ti.

World number 2 Zverev hian Grand Slam final pawh vawi thum a khel tawh - Australian Open bakah hian French Open leh US Open final pawh a khel tawh, mahse a chak lo zawkah a ṭang ziah.

A thiam zual pariat inelna ATP Finals-ah pawh kum 2028 leh 2021 khan a champion tawh a, inelna ngaihhlut 2020 Summer Olympics gold medal a la tawh bawk, a hmabak chu Grand Slam title chauh a ni.

6ft 6in hi kum 27 mi a ni a, a kum aṭanga chhut chuan vanglai a hmang mek - amah aia naupang zawk lakah a rilru a paukhauh tawk lo ṭhin a, tun hma lama an sawi tawh angin set nga khelhna tournament-a champion tur chuan dawhtheihna a mamawh.