Neymar-a contract an titawp

Al-Hilal leh Neymar chuan inhriatthiam tawnna in contract an titawp - Saudi Pro League tan thla saih daih khelh tura inremna la nei mah se, tunah chuan a khel chhunzawm dawn lo tih a chiang ta a ni.

Kum 32 mi Naymar hian kum 2023 August khan Paris Saint Germain aṭangin Al-Hilal hi a zawm a, pound maktaduai 77.6 man niin a hlawh pawh a ṭhahnem hle, mahse hliamin a tih buai ngun avangin Al-Hilal tan match sarih chauh a khelhsak.

Tun season atan match hnih chauh a la khel a, nikum November thlaa a inlan bak chu a la inkhel leh miah lo, tunah chuan a chawr chhuahna Santos lam a hawi leh dawn ta zawk a ni.

Saudi club Al-Hilal chuan thuchhuah siamin, "Neymar sulhnu leh hnathawh te avangin kan lawm a, kan hrereng tawh ang. Al-Hilal chuan a kal lehzelna turah duhsakna kan hlan," an ti.

Neymar hlawh zat chiah hi chiang taka tarlan ni lo mah se, khawtlang chanchinbu rintlakte chuan Al-Hilal aṭang khan kum khatah pound maktaduai 129.2 vel a hlawh niin an ziak.

Santos tana a khelh lai aṭangin Neymar hi khawvel hriat a ni phak daih tawh, match 255 aṭangin goal 136 a khungsak. Chumi hnuah Barcelona a pan a, Spanish club lian tan hian season li chhungin La Liga nomawi pahnih, Champions League leh Club World Cup te a lakpui hman a ni.

Khawvela player man tam ber ni turin Barcelona aṭangin Paris Saint Germain a zawm a, Paris club tan hian league nomawi panga a lak hnuah Saudi Pro League a pan leh a, a vanglai la pel lo mah se hliam vangin a inkhel tam thei ta lo thung.

Brazil tan goal 78 khung tawhin an ram tana goal khung tam ber a ni mek a, tunah chuan nakkuma World Cup khelh tur atan Santos lamah inbuatsaihna a nei dawn niin a lang.