Juve-ah Veiga a kal

Chelsea defender Renato Veiga chuan loan hmangin Juventus a zawm a, Italian club tan hian tun season tawp thleng a khel ang. A loan hun a zawh hunah a ngheta lei theihna dan an nei tel dawn lo a ni.

Kum 21 mi Veiga hian nipui bazar lai khan Basel aṭangin Chelsea hi pound maktaduai 11.8-in a zawm a, Blues tan hian Premier League match vawi khatah chauh inkhel bul a ṭan phak.

English club tan a khel phak lo a, inkhelh tam theih beiseiin Juve a pan. Old Lady hian player hawh manah hian pound maktaduai 3.8 an seng a, left-back ni mah se tlarhnung laia khelh tir an tum nia sawi a ni.

Kar hmasa mai khan Chelsea manager Enzo Maresca chuan, "Veiga hi kan hnena cham turin ka duh, chutihrualin player pakhatin khelh duhna bik hmun khat chauh a nei a nih chuan inlan phak tura a neih nasat a ngai ang," tiin a lo sawi tawh.

Juventus bakah hian Bundesliga club Borussia Dortmund chuan Veiga hi an beisei a, mahse a tawpah chuan Serie A table-a pangana ni lai Juve-in an chang - Allianz Arena-ah inlan phak tumin a bei ang.

Veiga an lakluh lai hian Brazil defender Danilo erawh Flamengo lamah a kal thung a, contract nei lai ni mah se Italian club nen hian inhriatthiam tawnna in an contract hi an titawp.