Firmino - Kan field atangin Anfield-ah

Hoffenheim midfielder Roberto Firmino-a'n UEFA Champions League vawi thum champion tawh Manchester United aiah vawi nga champion tawh Liverpool a thlang.

Liverpool leh Mizorama rawn zin tawh Hoffenheim te Brazilian midfielder Firmino chungchangah a thuphungin inremna an nei a, an inremna zat chu pound maktaduai 29 a ni. A man zat tura beisei hi English club-in Luis Suarez leh Fernando Torres te an lak luhna man aiin a sang zawk.

Brazil tana Copa America khel mek kum 23-a upa Firmino hian Anfield hi a pan a nih chuan pound maktaduai 35 man Andy Carroll zawha Liverpool player manto ber a ni ang.

Tarlan danin Reds chief execu­tive Ian Ayre chu Copa America khelhna hmun Chile-ah a awm mek a, Brazilian midfielder hian kum nga chhung daih contract a ziak tura ngaih a ni.

Player pangana

Liverpool-in season thar atan Burnley striker Danny Ings, goal­keeper Adam Bogdan, defender Joe Gomez leh midfielder James Milner te an la lut tawh a, player pali hian Liverpool ṭantute hlimna a pe zo lo.

Player pangana Firmino boruak erawh a dang daih, Hoffenheim midfielder hi Brazil duh lai a ni. Neymar hrem a nih avangin Inrin­nia Paraguay leh Brazil ten Copa America quarterfinal an khelh hunah Firmino leh Liverpool chhuan­­vawr Philippe Coutinho te an inkawp ang. Brazilian midfielder pahnih hi Premier League-a rorel thei khawpin an ṭha tawk.

Season tharah Liverpool legend Steven Gerrard a awm tawh dawn lo a, player pawimawh Raheem Sterling-a'n Manchester City a pan hmel bawk. Manager Brendan Rod­gers-a'n player ṭha chhuak vanga talbuai a tum lo, Firmino bakah player ṭha dang an la melh mek bawk.

Nikum season-a parukna Liver­pool-in Real Madrid defensive mid­fielder Asier Illarramendi bakah Copa America ti hmuhnawmtu Colombia forward Carlos Bacca leh Venezuela striker Salomon Rondon te an la melh bawk. Europa League khel tur Liverpool-in Chelsea, Manchester City, Arsenal leh Manchester United hnuaia awm reng an tum lo.

Tunge Firmino?

Roberto Firmino Barbosa de Oliveira hi October 2, 1991 khan Ma­ceio, Brazil-ah a piang a, Portugal international defender Pepe nen an pianna khua hi a in ang.

Kum 17-a upa a nihin Figuei­rense youth team a zawm a, hetih hunlai hian defensive midfielder-a chhawr ṭhin a ni. October 24, 2009 khan Toninho nen an inkhelh ṭum­in professional match hmasa ber a khel a, January 2010-ah first team-ah hlan kai a ni.

May 8, 2010 khan Sao Caetano nena an inkhelh ṭumin professional goal hmasa ber a khung a, chakna goal a ni bawk. Firmino hian season khatnaah match 36 khelin goal riat a khung a, Figueirense hi Serie A a kai pui bawk. Figueirense hi Filipe Luis (Chelsea) leh Andre Santos (Arsenal) bakah Borussia Dortmund defender hlui Felipe Santana te khelh ṭhinna a ni.

Hoffenheim lamtluang

Europe-a Brazilian player dang ang lo takin Brazilian football second division (Serie B) player Fir­mino hi Hoffenheim-in euro maktaduai 4-in January 2011-ah an la lut a, thla khat hnuah match hmasa ber khelin minute 75-naah Sebastian Rudy a thlak a, an chak lo.

April 16-ah Eintracht Frankfurt lamah club tana a goal hmasa ber a khung a, inkhela goal awmchhun a ni. November 2011 thla tawp lamah Chinedu Obasi nen practice an tlai avangin first team aṭangin paih thlak an ni a, Bayer Leverkusen hmaah a inlan lo. Hemi season hian goal hnih dang a khung.

2012-13 season-ah Firmino-a'n match 36 a khel a, goal sarih a khung. Hoffenheim captain Andreas Beck chuan Brazilian player chu hmuh theih a hma a sawn thu a sawi a, a fak hle.

Firmino a ṭha tual tual

2013-14 season-ah Firmino-a'n Bundesliga-ah goal 16 a khung a, ani aia khung tam chu Robert Lewandowski, Mario Mandzukic leh Josep Drmic te chiah an ni. Hemi season vek hian assist vawi 11 a nei a, assist ngah lamah Marco Reus chiah a pha lo.

2014-15 season-ah Brazilian midfielder hian goal sarih chiah a khung a, Hoffenheim player-ah Kevin Volland chiah ama aia khung tam an awm. Season hmasa lam ang thoin assist a ngah a, vawi 10 assist neiin Kevin De Bruyne leh Zlatko Junuzovic te chiah a tluk lo.

Brazil tan Firmino

World Cup khel turin Firmino koh a ni lo a, May 13, 2014 khan Lam­mualah a inkhel lai Mizo mipuiin an hmuh theih phah. German club-in Mizoram 3-0 a an hneh ṭumin Anthony Modeste-a'n goal hmasa ber a khung a, French forward goal khung hi Firmino pass a ni.

November 13, 2014 khan Brazil-in friendly match-ah 4-0 in Turkey an hneh a, a vawi khatna atan Firmino-a'n ram tan a khel ṭan. Liverpool player thar hian ram tan vawi kua a khel tawh a, goal li khung tawhin a goal khung zawng zawng hi chakna goal a ni vek.

Firmino thukhawchang

Brazilian journalist Tariq Pan­ja-a'n press conference-ah Fir­mi­­no hi England lam pan a tum chungchang a zawt a, Brazilian midfielder chuan, "Ka hmalam hun chu Pathian kutah ka dah. Tunah chuan Copa America chiah ka ngaihtuah," tiin a chhang.

Mizoram-a an rawn kal ṭum khan Vanglaini palaiin Chelsea nen an sawi zawm chungchang a zawt tawh a, khami ṭum khan Firmino hi a nui suk ringawt a, English club a pan lo.

Tun ṭumah chuan thuthang mai mai a ni ta lo, kan field-a inkhel tawh kha Anfield mawitu a ni dawn.