Copa America Bolivia hmaah Peru

Naktuk zing dar 5:00 khian Estadio Municipal Bicentenario German Bec­ker-ah Bolivia leh Peru te chuan Copa America quar­terfinal an khel dawn a, tukin zing khan Chile leh Uruguay te chuan an khel tawh bawk.

Group C aṭanga rawn ding chhuak Peru hian an group-ah Brazil chiah tluk loh an neih avangin an khingpui tur Bolivia hi an hlau bik lo ang. Hetih rual hian Bolivia hian group A-ah a thlengtu Chile tih loh chu tluk loh an neih bik loh avangin Peru tan zuam ngawt chi an ni dawn bik lo.

Ram pahnihah Peru hi tun hnaiah Copa Ameri­ca biakah hnuhma nei ṭha zawkin kum 2011 khan semifinal an lut a, an khingpui tur Bolivia erawhin kum 1997 hnu lamah quarterfinal an la paltlang leh lo. Amah­erawhchu an mahni pahnih inkhelh bikah chuan Bolivia an chungnung hle a, vawi 16 an inhmachhawn tawh aṭangin Peru hian vawi li chiah hnehna an la chang ve thei.

Peru innghana tur chu striker kum 36-a upa Claudio Pizzaro a ni leh dawn a, ani hian Venzuela an hneh ṭum­­in goal awmchhun a khung nghe nghe. Pizarro bakah hian kum 30 chuang vek tawh Juan Manuel Vargas, Jefferson Farfan leh Paolo Guerrero te tan chuan an tournament lian khelh hnuhnung ber a nih a rinawm tawh avangin semifinal inhlankai an duh hle ang.