Gerrard-a'n Liverpool a chhuahsan chhan a sawi

Liverpool captain chhuak ta Steven Gerrard chuan Anfield chhuahsan tura thutlukna a siam chhan sawiin Santiago Bernabeu-a Real Madrid nen an inkhelh ṭuma bench a ṭhut tir a nih vang niin a sawi.

Kum 35-a upa Gerrard hi Champions League group stage-a Real Madrid khelmuala an zinchhuah ṭumin bench-ah ṭhut tir a ni a, hun tawp minute 20 a la awm tihin tlan luh tir ni mah se Real khelmualah hian 1-0 in an tlawm ta tho a ni.

Team kaihruai thiam tak a nih vanga Captain Fantastic tia hminglem an vuahsak chuan, "Brendan nen a khat tawkin kan titi reng a, 'I khelh dan te uluk taka enin ka zirchiang reng dawn che a, tha tho taka awm reng tura ka duh che vangin kar khata vawi thum vel inkhelh tir che ka tum lo, i chau lutuk palh ang,' tiin min hrilh a, khata ṭang khan Liverpool-a ka hmalam hun ka ngaihtuah ṭan a ni," a ti.

A vanglai hun zawng zawng Liverpool-a hmangtu Gerrard chuan, "Thutlukna ka siam ṭan tak takna erawh Champions League-a Real Madrid nen kan inkhelh ṭum khan a ni. Ka beisei loh takin bench-ah ka ṭhu a, Real Madrid ang team ṭha tuma khelh loh chu a hrehawm em em a ni. Bench-ah khan lungawi lo takin ka ṭhu a, hmun dang pana thil thar hmachhawn ka mamawh tih ka inhre nghal a ni," tiin match pawimawha khelh tir a ni lo chu a hriatthiam loh thu a sawi.

Gerrard chuan Chelsea an tum ṭuma a tawlhthluk vanga Liverpool-in Premier League title an chawi teuh tawh tak an hloh chungchang sawi chhuakin, "Ka tawlhthlu kha hrehawm ka ti em em a, ni khat pawh kha match-ah khan tawlh thlu lo ta ila eng nge thleng ang tih ngaihtuah lo hian hun ka hmang ngai lo," tiin Premier League nomawi chawi theihna hun ṭha khawhraltu a ni chu hreh­awm a tih thu a sawi bawk.