Ramos thleng nan De Gea hmang lul suh - Neville

Media lamin Real Madrid defender Sergio Ramos leh Manchester United an sawi zawm nasa bawk a, United legend Gary Neville pawh a ṭawngchhuak ve ta.

United captain hlui Neville chuan, "United-in Ramos la lut turin pound maktaduai 40 leh De Gea an mamawh tiin an ziak maw? United hian thleng lul suh se. Ramos nen kan inkarah intihthiam loh na chu a awm lo, mahse a dik thei lo a ni," tiin twitter-ah a ziak.

Spain lama record ṭhen­khatah chuan Sergio Ramos hi pound maktaduai 53-in an ziak a, hetah hian United Spanish keeper David de Gea a tel.

Spanish keeper De Gea hian United-ah kum khat contract a la nei a, English club hian an keeper ṭha aṭang hian pound maktaduai 25 tal lak luh an tum niin tarlan a awm bawk.

Real Madrid president hlui Ramon Calderon erawhin United-in an tihfuh a ring thung. Calderon chuan, "Sergio Ramos hi Real Madrid fan-te ngaihsan bik a ni. Field chhung leh pawnah hruaitu ṭha a ni a, centre back ṭha ber chu ka ti ngam lo a, mahse a ṭha ber zinga mi a ni," tiin a sawi.

Real president hlui chuan Ramos fak chhunzawm zelin, "Right back-ah a khel thei a, midfielder a ni thei a, a career ṭan tirh lamah chuan striker a ni bawk. A rilru a huaisen a, Man United-in an la lut thei a nih chuan an vannei khawp ang. Tuna kan tih theih chu thil thleng tur ngaih chan hi a tawp," a ti.

Manchester United suppor­ter zingah Ramos lak duh lo an awm a, internet lamah Spanish defender na taka sawisel an tam hle. United hmelma Liverpool legend Jamie Carragher chuan Ramos sawiseltute hi a chhang let.

English defender Carragher chuan, "Ramos sawiselna ka hmuh hian ka rilru a na a ni. He player hian chawimawina dawn theih zawng zawng a dawng vek a, khawvel club ṭha berte zinga tel pha Real Madrid tan a khel a, khawvel ram ṭha ber zinga chhiah tel theih Spain tan a khel bawk. Ṭhat lohna chu a nei ngei ang, mahse amah hi khawvel defender ṭha ber zinga chhiar tel a nih lo chuan tunge ṭha ber ni chuang?," tiin United supporter-te zawhna zawt let.

Liverpool legend chuan sawi zuiin, "United-in an lak luh leh luh loh hi ka ngaihtuah lam a ni lo a, United mamawh a nih leh nih loh ka sawi lo. A nomawi chawi zat hi chhiar ila, a ṭha tih chu a chiang a ni. Real Madrid hian amah aia defender ṭha zawng se an hmu maithei, mahse tun dinhmunah chuan an la hmu lo a nih hi. Real tan kar tinin a inlan a, an sawiselna ang dawn hi chu a phu a lo," tiin Ramos a chhan.