Lewis-Skelly hremna an sut

Arsenal defender Myles Lewis-Skelly chu match thum khel thei lo tura hrem ni mah se, hrem a nihna hi an khinlet hnuah sutsak a ni a, hremna a tawk dawn ta lo a ni.

Kar tawp Premier League-a Gunners leh Wolves inkhelh ṭumin Wolves lamin counter attack hmanga vuak let theihna remchang an nei a, anmahni goal bul maiah Lewis-Skelly hian Matt Doherty chu a ti tlu.

Match referee Michael Oliver chuan chuan Lewis-Skelly hi a hnawtchhuak, red card hi video assistant referee (VAR) hmanga ennawn a ni a, hnawhchhuah a ni zui ta tho.

Arsenal chuan an player hnawhchhuah dan hi dik lo niin an hria a, football chanchin sawitu tam takin an sawi bawk. Thuneitu sang Football Association hnenah thlen niin, anni hian thutlukna dik lo a ni tih an lo pawm.

Arsenal manager Mikel Arteta chuan, "Thil thleng kha a tirah pawh kan hmu a, a hnuah uluk takin kan en let bawk, keini lam chuan red card turah kan ngai lo, dik taka thutlukna an rawn siam ta hi ka lawm takzet.

"Hremna a hmachhawn dawn loh takah chuan player khel thei kan ngah leh ta sawt tihna a ni a, match khelh tur ngah laia thu hriat atan chuan a lawmawm hle," tiin a sawi.

Arsenal hian hliam vangin player chhawr theih loh an nei nual, hetih lai hian Kieran Tierney erawh tun thlasik chhungin a chhuak dawn rih lo a, nipui bazar inhawn hunah erawh Celtic a pan dawn chiang niin Brendan Rodgers chuan a sawi thung.

Nizan khan Gunners hian Champions League an khel, tun kar tawp hian Premier League champion lai Manchester City an mikhual zui nghal dawn, league title beiseina chhi nung zel turin Pep Guardiola naute hneh an mamawh.