Spurs leh Postecoglou tan boruak siam hun

An result a ṭhat tawh loh avangin Tottenham Hotspur manager Ange Postecoglou chuan sawisel a hlawh mek a, zanin dar 1:30 hian Europa League khel turin IF Elfsborg an tum dawn, an boruak vawrh kan theina remchang tur a ni ang.

Premier League lamah chuan Spurs hian point 24 chauh hmuin 15-na an ni mek, an tan season thara Champions League khelh phak beisei ngam chi pawh a ni tawh lo. Chutihrualin, Europa League champion an nih chuan UCL ticket an nei thei dawn.

An chet ṭhat tawk loh lai pawhin club chairman Daniel Levy chuan an coach Postecoglou hi a thlawp rih tlat a, mahse an tho kang thei lo reng a nih erawh chjuan Levy-a ngaihdan pawh hi danglam ve thei reng a ni, a pawimawh ber chu hnehna chan a ni.

Europa League bikah chuan Tottenham hi an che chhe lem lo, zaninah hian an chak a nih chuan midang inkhel result ngaihchan tel ngai miah loin last 16 an lut dawn, playoff khelh ngai loa tlang theih chu an duhthusam pawh a ni ngei ang.

Spurs hian manager langsar tak tak - Jose Mourinho, Antonio Conte leh Nuno Espirito Santo te pawh an nei tawh ṭhin, mahse an champion thei lo. Tuna an manager Postecoglou tan pawh hna a awlsam lo ang tih chu thil chiangsa a ni.

EPL beisei ngam tawh lo mah se League Cup semifinal an lut tawh a, si khat faiin Liverpool lakah hma an hruai mek - second leg an la hmabak. FA Cup fourth round lut tawhin Europa League an la beisei bawk - Austrian manager tan dinhmun chhanhim theihna kawng a la inhawng.