Lakers hnehtu Philadelphia 76ers

Nimin zing NBA inkhelah Philadelphia 76ers chuan Los Angeles Lakers chu 118-104 in an hneh, an chak theih nan hian Tyrese Maxey chuan point 43 neiin a thawhhlawk hle a ni.

Wells Fargo Center-a inkhelah 76ers tan hian Maxey bakah Kelly Oubre Jr (20 points), Ricky Council IV (16) leh Eric Gordon (14) te an khel ṭha hle bawk a, team ṭha zawka ngaih Lakers lakah an chak.

Lakers thiampuipa LeBron James-a'n point 31 a neih bakah rebound vawi riat lain ṭum kua chu assist a nei bawk a, chakpui nan erawh a tawk zo lo a ni. Quarter khatna an khelh laiin Anthony Davis chu a pum na vangin a inkhel zui thei tawh lo, player pawimawh inlan rei theih loh an tuar.

Inkhel dangah Houston Rockets chuan Atlanta Hawks chu 100-96 in an hneh, a zawna vawi nga an chak theih nan hian point 25 neitu Jalen Green a khel ṭha hle a, point 18 neitu Alperen Sengun a langsar bawk.

Stephen Curry-a point 23 hmangin Golden State Warriors chuan Utah Jazz chu 114-103 in an hneh ve bawk a, hliam vanga Draymond Green leh Jonathan Kuminga te khel thei lo chunga an chak hi chanchin lawmawm a ni ang.