Brighton-in Ferguson chhuah phal

Premier League Brighton & Hove Albion chuan an forward Evan Ferguson chu thlasik transfer-ah a ngheta chhuahtir an phal a, an lungawina ang zata dawrtu an awm a nih chuan Republic of Ireland international hi a ngheta chhuahtir an hnial lo.

Kum 20 mi striker hi West Ham United, Everton leh Bournemouth-ten loan-a lak an duh nia sawi a ni a, hetihlai hian England pawn lam club aṭangin Marseille leh Bayer Leverkusen hming lam rik a ni bawk.

Hammers hi Brighton boss hlui Graham Potter-a'n a enkawl mek a, Ferguson tan a pu hlui club hi zawm a châk mai thei. Hetihlai hian Marseille pawh Brighton lama a pu hlui tho Roberto De Zerbi chuan a enkawl a, Ferguson tan duhthlan tur a tam hle.

German champion Leverkusen hian an striker Victor Boniface chu Saudi Pro League club Al Nassr lamah an kaltir dawn a, Ferguson tan Xabi Alonso hnuaia khelh hi thil châkawm tak a ni ve thei bawk.

Ferguson hian 2021-22 season khan top flight football khel ṭanin, 2022-23 season-ah phei chuan match 25-ah goal 10 ngawt a khung. season hmasa pawh kha league match 12-a goal ruk khung chungin bul a ṭan a, hliamin a tlakbuak zui.

Ireland tan vawi 18 inlana goal li khungtu hian a dam hnuah ngai a awh leh rih lo a, inelna hrang hrangah match 36 khel tling mah se goal a khung zui lo. Tun season inelna hrang hrangah match 14 khelin goal khat chiah a la khung.

Brighton head coach Fabian Hurzeler hnuaiah Ferguson hian hmun pawimawh a chang phak lo a, Danny Welbeck, Joao Pedro leh Georginio te a tluk lo.