Al Nassr-in Boniface an la lut dawn

Cristiano Ronaldo khelhna Al-Nassr chuan Bayer Leverkusen aṭangin striker Victor Boniface chu an la lut dawn niin Sky Sports Germany chuan an tarlang a, kum 24 mi striker hian a vanglai takin Saudi lam a pan dawn tihna a ni.

Al Nassr hian Nigerian striker manah hian euro maktaduai 60 an seng dawn a, kum khatah €15mtd an hlawhtir bawk ang - Boniface hian medical thlengin a paltlang tawh nia sawi a ni a, he thuziak i chhiar meuh chuan Saudi club player a ni tawh hial mai thei.

Boniface hian season hmasa khan Bayer Leverkusen chu Bundesliga, DFB-Pokal leh German Super Cup-ah champion nomawi a chawipui a, inelna hrang hrangah match 34 khela goal 21 khungin assist vawi 10 a nei.

Tun season-ah pawh Nigerian striker hi a chet ṭhat chhunzawm a, Leverkusen tan inelna hrang hrangah match 15 khel tawhin goal riat a khung a, assist vawi khat a nei bawk.