Sheffield United tan Wilder a rinawm

Championship club Sheffield United chuan an coach Chris Wilder chu an hnena cham chhunzawm zel turin contract thar an ziahpui a, English coach hian 2027-2028 season thleng chu Sheffield hi a enkawl ang.

Chris Wilder hi Sheffield-ah hian a mikhual hran lo. 2016–2021 inkarah khan a lo enkawl tawh a, a enkawl tirha League One club hi Premier League hial hruai kaiin a hmingṭhatpui hle.

Mahse, March 2021 khan Premier League table mawngphah luahin, inhriatthiam tawnnain Sheffield a chhuahsan a, Middlesbrough leh Watford a enkawl leh hman. December 2023 khan a lo kir a, Championship table-ah pahnihna an ni mek.

Wilder-a contract hi season tawp ruala tawp tur a ni a, mahse, club neitu thar American sumdawng pawl COH Sports chuan Wilder hi chhuah an phal lo a, an chelh.

Kum 57 mi coach chuan, "Sheffield United hi ka club a ni a, he club aia awm châkna zawk hmun ka nei chuang lo - he club-a ka awm zel thei tur hi ka lawm hle," tiin a sawi.