Pellegrini-a'n Mourinho chhuahchhal

Manchester City manager Manuel Pellegrini-a'n an elpui Chelsea manager Jose Mourinho chu hming ṭhatna zawng zawng hui tumah a puh.

Portuguese manager hian kum 2010 khan Pellegrini thlakin Real Madrid manager a ni a, heta ṭang hian manager pahnih boruak hi a ṭha lo ṭan a, Premier League club lian an enkawl zui ve ve avangin an inkar hi a ṭha lo tawlh zui zel bawk.

2013-14 season khan City hi Chelsea chungah Premier League champion an ni a, amaehrawhchu nikum khan Chelsea chungnung zawkin Premier League leh Capital One Cup-ah an champion.

Chelsea an champion tirh khan Pellegrini hian an elpui hi lawmpui mah se hun a liam zel a, a ngaihdan dik tak a sawi chhuak.

Chilean manager chuan, "Mourinho hian nomawi a chawi chuan hming ṭhatna zawng zawng hui vek a tum. Kei chuan ka ti ve ngai lo, Premier League kan champion khan engmah ka sawi lo. Mourinho hi ka hmelma a ni lo a, inhuatna kan nei lo a, mahse amah nen hi chuan kawng hrang hrangah kan inang lo a ni," tiin a sawi.

Pellegrini hian May thla kha ngeiawm takin Mourinho chungchang hi a lo sawi tawh bawk. Manchester City manager chuan, "Chelsea kan tum apianga ka sawi ṭhin chu, player ṭha awmna team tenau tak kan tum tur thu ka sawi ṭhin. Khelh dan hmang chu a inang lo a, club lian chuan inkhel an thunun ang a, goal an khung a, chak an tum bawk tur a ni," tiin defensive game khel ṭhin Chelsea a sawisel.

Chutihrualin Mourinho-a'n ṭawngkam a duh tui loh avangin Pellegrini a ṭawngchhuak hi a mak lo.

February 2014 khan Mou­rinhho chuan, "Kei ni lam hi chuan Manchester City ang lo takin nakin thlirin team kan din a, City hi chuan tuna khel ṭha thei tur player an lei khawm a, an duh apiang an lei thei," tiin City a bei a. Pawisa hman an thiam thu sawi telin Portuguese manager chuan, "Mata kha pound maktaduai 37-in kan hralh a, De Bruyne pawh pound maktaduai 18-in kan hralh a, chumi belhkhawm chu pound maktaduai 55 daih a ni. Matic hi pound maktaduai 21 man a ni a, Salah hi pound maktaduai 11 a ni bawk a, chuvangin pound maktaduai 23 kan hlêp zawk a ni," a ti.

Pellegrini bei tel hramin "Thil nuihzatthlak em em mai chu Mourinho chung chang a sawi chhunzawm ngai loh thu leh Mourinho a hnial ngai loh thu hi Spain-ah pawh khan a sawi tawh," a ti!

Kuminah pawh Mourinho chet duh dan a la ngai reng. An champion zawh khan Manchester City khelh dan hmang a deuh sawh a, United leh Arsenal an bang bik lo.

'The special one' tiha inchhal ngam Mourinho chuan City chu goal khung ṭheuh ṭheuh a, goal venhim lam ngaihsak loah a chhuah. Manchester City hian season khelh zawh takah khan goal 83 an khung a, goal 38 an chhuah a. Chelsea-in goal 73 an khung a, goal 32 an chhuah. Real Madrid coach hlui hian anmahni aia goal chhuah hnem City hi a nuihzat hle.

Tunah Pellegrini-a'n thawm a rawn nei ve leh chiah a, Mourinho a ngawi reng lo ang. Manager ṭha pahnih hi season thar boruak ti ngaihnawmtu tur an ni.