English club Northampton Town lei tum Indian sumdawng
Kum 2010-ah Indian sumdawng hausa Venky's London Limited neitu te'n a hunlaia Premier League club Balckburn Rovers an lei a, tun hnaiah Indian sumdawng hausa intelkhawm an hming tarlan loh chuan League Two club Northampton Town lei an tum ve leh dawn nia sawi a ni.
Indian sumdawng hausate aiawh leh Northampton Town aiawhte hian inbiakna kalpui mekin Indian sumdawng hausa te hian English club neitu nihna zawng zawng hi neih vek an phut a ni.
Northampton Town neitu leh chairman David Cardoza chuan, "Kan duhthusam chuan 50% club neitu nihna hi hralh kan duh a, mahse inbiakna kan neihpui mek te hian club neitu nihna zawng zawng neih vek an duh a ni. Kan beisei ang chiahin indawrna kalpui lo mah ila tu te tan pawha hlawk tlanna tura thutlukna siam kan duh si a ni," a ti.
Cardoza chuan thla khat chhunga club chu hralh hman a inbeisei thu sawiin club tana ṭha tur hnenah lo chuan a hralh loh tur thu a sawi tel bawk.
Northampton Town lei tumtu te hian club mai bakah hian an khelmual Sixfields ground bul vela ram zawng zawng lei tel nghal an tum a, League Two club hi siam len an tum hle.
Kum 2003-a Northampton Town neitu nihna chelhtu Cardoza chuan hemi chungchang hi sawilang nghalin, "Northampton khawpui tan tuna min dawr mektu te hi mi ṭangkai tak an ni thei a, he khawpui ṭhan zel nan pawh hian an thawhhlawk thei a ni," a ti.
Indian sumdawng hausate hi League Two club season hman zawh taka 12 na ni pha ṭawkah hian an tui tak tak lo a, a khawpui chhunga sumdawnna kalpui an duh vang mai maiin Northampton Town hi lei an tum nia sawi a awm.
Mahse, he thuthang hi Cardoza chuan thuthang dik lo mai mai a nih thu sawiin, "Football-a hmalakna liantham neih an duh vanga indawr kan ni a, chutiang ni lo se kan in dawr lo ang. He club hi hmasawn tura nasa taka puih an duh a, hotel leh conference center-te sak tel an duh bawk. Tuna kan hmalakna hi Northampton tana thil ṭha a ni a, reilo teah fan-te chu an hlim em em ang," tiin Indian sumdawng hausa te chuan sum vang ringawta dawr an nih loh thu a sawi.