Tennis player-te aṭangin zirtur kan nei - Mourinho

Chelsea manager Jose Mourinho chuan footballer-te chuan tennis player-te aṭangin zir tur tam tak an neih thu a sawi. A bik takin tennis star-te rilru pau khauhna chu entawn tlak a tih thu a sawi bawk.

Season hmasa Pre­mier League-a Chelsea champion puitu manager hi tennis fan ruhkawl a ni a, hun awl a neih chuan tennis inkhel en a peih hle. Kar hmasaa khelh zawh tak Aegon Championship pawh kha a hmunah kalin a en ṭhin. Andy Murray champion lai pawh kha a hmun ngeiah kalin a lawmpui thu a sawi nghe nghe.

Portuguse manager chuan "Tennis hi ka ngaina em em a, hun ka neih phawt chuan ka hmaih ngai lo. Player te inzah tawn taka an inkhel lai hmuh hi a nuamin a hlimawm hle. Tennis player te hi an fin bakah an rilru a pau khauh in boruak sang an dawl zo hle. Court chhungah mahni chauh a din ringawt pawh hi zam tham chu a ni ngei mai, amaherawhchu anni ho hi chuan huaisen takin an khingpuite an bei ṭhin. Heng an rilru huaisenna hi footballer te pawh hian entawn thei se chu kan hlawkpui khawp ang," tiin a sawi.

Karleh maia khel ṭan tawh tur Wimbledon pawh en chak hle mah se Stamford Bridge lamah season thar aṭan inpuahchah a ngaih tawh avangin he inelna hi Mou­rinho hian a hmunah a en thei tawh lo ang.

Mourinho chuan, "Tournament en turin zin chhuah na hun ka nei tawh dawn lo, mahse tennis hi infiamnaah chuan ka ngainat ber pawl a nih avangin inah TV aṭangin ka en tho ang. Darkar thum emaw darkar li emaw vel tennis inkhel en tur chuan harsatna ka nei lo. Grand Slam dang zawng zawng aiin ka dah sangin ka ngaina a, chuvangin ka nghak hlel tawh hle," tiin Wimbledon en a tum ruh hle.