Kane telna England an tla nghal European U21 Championship
Premier League-ah Harry Kane thlipui a tleh a, European U21 Championship-ah Tottenham Hotspurs striker hian goal a khung lo. Nilaini zan khan England-in Ander stadium, Czech Republic-ah Italy 3-1 in an hneh lo a, group stage-ah an tla nghal.
Inkhel dangah Portugal leh Sweden te 1-1 in an inhnehtawk a, England-in semifinal thleng turin point khat chiah an mamawh a, Italy lakah an mualpho. Group B aṭangin Portugal leh Italy te'n semifinal an lut a, Group A aṭangin hmahruaitu Denmark leh pahnihna Germany ten semifinal an lut ve bawk.
Inkhel chu
England coach Gareth Southgate hian 1998 World Cup khan groupstage hnuhnung berah Italy goal awm loin an draw a, second round an lut. Amaherawhchu England defender hlui hian a naute knockout stage a thlenpui lo.
Liverpool player Danny Ings-a'n a vawi khatna atan starting eleven a chang a, goal awm hmain chance ṭha a hlah. Hemi hnu hian Ings hian a ke vei lamin koh takin a pet a, Italy keeper Francesco Bardi-a'n a dan sak.
Italy tlar hnung an inrem phui ṭha a, England passing a ṭhat tawk loh bawk avangin Spurs chhuanvawr Kane-a'n ball ṭha a hmu lo.
Italy-in minute 25-naah Andrea Belotti hmangin an khung a, minute hnih hnuah Marco Benassi-a'n a khung leh bawk. Benassi hian second half-ah Italy goal thumna a khung zui a, 3-0 a nih hnuah England tan beisei tur a a awm tawh lo.
Injury time-ah Nathan Redmond-a'n England mualphona ti nep turin goal khat a khung ve hram. England 1-3 in an tlawm a, Group B mawngphahah an awm.
Coach thukhawchang
England coach Gareth Southgate chuan, "Contract ka la nei a, England U21 enkawl zel hi ka duh a ni. Kum hnih chhungin thil tam tak an zir a, inelna neih hma kar hnihah pawh field chhung leh pawna awmdan thil tam tak an hre bawk. Mahse vanduai thlak takin football a ni tlat a, Italy hmaah an khelh ṭhat ber ṭum an lantir chungin an chak lo," tiin result ṭhat loh vangin ban a tum lo.
Southgate hian kum 2017 thleng contract a nei. England hian inhliam vangin qualifier-a top scorer striker Saido Berahino an chhawr thei lo a, hei bakah hian Liverpool forward Raheem Sterling, Everton playmaker Ross Barkley leh Arsenal midfielder Jack Wilshere te chu tel thei tho mah se senior team tana an khelh hun vangin an ko tel lo bawk.
England coach Southgate hi insawifiah ngial mah se hrang hlui player Alan Shearer, Andrew Cole, Joey Barton leh Michael Owen te chuan England U21 chet dan chu social media kaltlangin an sawisel.
England Record
Ü 2013 European Under 21 Championships - Groupstage-ah Italy, Norway leh Israel te nen an awm ho a, group mawngphah an ni.
Ü 2014 World Cup - Groupstage-ah Costa Rica, Uruguay leh Italy te tluk loin table mawngphahah an awm.
Ü 2015 European Under 21 Championships - Portugal, Sweden leh Italy te nen group khatah an awm a, table mawngphah an ni.