Wenger chungah Chambers a lawm

Season hmasa a Sou­thampton aṭanga Arsenal zawmtu defender Calum Chambers chuan a season khatna a an manager Arsene Wenger-a'n a lo enkawl danah a lawm thu a sawi.

Nikum July thla khan Emirates Stadium-ah kum 20-a upa defender hi lawm luh a ni a, tlar hnungah chuan a sirah leh a laiah a khelh theih avangin Pre­mier League-a Gunner-in pathumna dinhmun an luah theih nan a thawhhlawk hle.

A season khatnaah hian a club tan vawi 36 ngawt a inlan nghal a, manager Wenger-a'n a chhawr ṭangkai em avang hian nikum September thla khan Roy Hodgson chuan England tana khel turin a ko hial. An ram tana a match hmasa ber chu Norway an hmachhawn ṭumin a khel a ni.

An manager chunga a lawmthu sawiin Chambers chuan, "Tawn hriat ka la neih tam loh avangin Arsenal kan zawm tirh khan zir tur ka ngah hle. Kan manger Wenger hian tih tur leh tih loh tur thlengin chiang takin min hrilh ṭhin a ka hlawkpui hle. Hmasawnna tur ka la ngah avangin ka chak lohna min hmuh thiam sak ṭhin a, min fuihin min zilh nasa bawk a, ka hlawkpui ṭhin viau. Emirates Stadium-ah hian player ṭha ber ni turin ka bei zel dawn a, nitin hian hmasawn turin ka bei zel dawn a ni," tiin a sawi.

Chambers hi Euro U21-a knock­outstage thleng zo lo England team-ah a tel.