Copa America Naktuk zingah Messi Vs Rodriguez

Inrinni zing dar 5:00 hian Argentina leh Colombia te chu Copa America 2015 semifinal luh inchuhin Estadio Sausalito-ah an innuai dawn.

Tun hmain ram pahnihte hi an lo inkhel nual tawh a, vawi 35 an inkhel tawh aṭangin Argentina chungnung zawkin vawi 21 hnehna an chang tawh. Colombia hian vawi riat hnehna chang ve tawhin a bak vawi ruk chu an inhnehtawk a ni.

Tun hnai an intawn hnuhnung vawi 13-ah Colombia hian vawi hnih chiah hnehna an chan avangin Inrinni zingah pawh hian Argentina hi chak zawk tura rinkai an ni. An intum hnuhnung ber chu kum li liamta daih tawh kha a ni a, Copa America-ah tho niin goal lut loin an inhnehtawk nghe nghe.

Khawvel football thiam ram tia sawi ni ṭhin mah se Argentina hian kum 22 chhung zet chu eng inelnaah mah an champion tawh loh avangin player ṭha rual Lionel Messi, Sergio Aguero, Carlos Tevez, Gonzalo Higuain leh Angel di Maria te an kawl khawm lai hian he an record chhuanawm lo zet mai hi an thai reh theih a rinawm.

Argentina hian an group match hmasa berah Paraguay lakah an goal hnih neih sa an humhim zawh loh avangin an mualpho. Hei vang hian manager Gerardo Martino a fimkhur a, goal thun aiin a venhim lam a ngai pawimawh. An match hnuhnung pahnihah Uruguay leh Jamaica an tum ṭumin goal khat chiah khung mah se goal an chhuah miah lo thung.

Colombia pawh hi an tlar­hnung a phu ṭha hle mai a, an match hmasa berah Venezuela lakah goal khat an chhuah bak kha goal an chhuah zui tawh lo. Brazil leh Peru lakah an goal an venhim theih avangin Messi leh a ṭhiante hna hi a awlsam dawn lo.

Jamaica nen an inkhelh ṭum­in attacking player ṭha ruam nei chung si a goal khung tum ngam lo tiin mi tam takin an sawisel hial. A game plan chungchang sawiin Martina chuan, "Inkhelah chuan chak turin goal khung a pawimawh a, chumi tluk chiah chuan goal chhuah loh a pawimawh bawk. Goal khung ṭeuh mah ila kan chhuah leh zel chuan awmzia a awm lo. Tuna kan tum ber chu kum 22 chhung champion nomawi chawi lo a kan awm tawh tih reh hi a ni ang," tiin goal chhuah loh chhunzawm a tum hle.

Rodriguez a pawimawh

Tun tournament-ah Radamel Falcao-a'n beisei a phak loh avangin Colombia innghahna chu Real Madrid star James Rodriguez a ni lo thei lo.

Colombia playmaker hi kum 23 chauh a upa la ni mah se tunah chuan an ram inngahna a ni tawh. Quarterfinal thlir lawkin Rodriguez chuan, "Kan duh leh beisei angin kan la khel chhuak zo lo a, mahse semifinal thleng tur chuan kan ṭha ve tawk viauin ka hria. Kan khingpui tur Argentina hi team ṭha tak ni mah se kan team-ah pawh hian theihna nei sang tak tan an awm ve tho avangin ka zam bik lo," tiin quarterfinal a tawp mai a tum bik lo hle.