Copa America Semifinal lut hmasa ber Chile

Uruguay striker Edison Cavani hnawh­chhuah a nih hnuah Chile defender Mauricio Isla-a'n chakna goal a khung a, Copa America thlengtu Chile-in semifinal an lut.

Chile hi kum 1916 aṭanga ṭan tawh Copa America-ah an la champion ngai lo a, tukin zinga Peru leh Bolivia inkhel chak zawk zawk nen semifinal-ah an inhmachhawn ang.

Chile-in Arsenal forward Alexis Sanchez leh Juventus midfielder Arturo Vidal an nei a, inkhel thunun kawngah erawh playmaker Jorge Valdivia chu player pawimawh a ni. Luis Suarez-a tel lohna Uruguay an che thei lo a, ball possession pawh 20% chiah an chang.

Inkhel thunun siin Chile-in goal an khung thei mai lo a, yellow card vawi ruk bakah red card vawi hnih phawrh a ni a, chu chuan inkhel boruak chu a sawi fiah awm e.

Estadio Nacional-a inkhel ti danglam­tu chu Cavani red card a ni. PSG forward hian minute 63-naah assistant referee laka a chet mawi loh avangin red card pek a ni a, Uruguay jersey haa a vawi khat red card hmuhna a ni.

Cavani pa Luis Cavani-a'n Thawh­lehni khan kum 19-a upa bike khalh lai chu a su hlum a, Uruguay forward hian an rama haw a tum hman a. Uruguay team enkawltute'n chelh a, result ṭha erawh a neih sak thei ta bik lo.

Player 10-a khel Uruguay an ṭang tluan thei lo a, minute 81-naah Uruguay keeper Fernando Muslera-a'n ball a hnek chhuah nat tawk loh avangin Chile defender Isla'n chakna goal a khung.

Injury time minute hnih a la awm laiin Uruguay defender Jorge Fucile-a'n Chile forward Sanchez a tih tluk vangin hnawhchhuah a ni a, hun a tlem tawh bakah player pakua chauh an nih tawh avangin an tho leh tawh lo.

Chile hian inelna hnuhnung pangaah ṭum li quarterfinal an paltlang lo a, Uruguay vawi thum an hneh lo. Tun ṭumah erawh Chile an chak ta a, champion turin beiseina an nei sang hle.

Uruguay manager Oscar Tabarez chuan, "Television leh thlalak aṭangin engkim a chiang. Lungawi lohna tam tak kan nei a ni," tiin an chak loh danah a lawm loh thu a sawi.

Inkhel Thlirna Tawi

Chile 1 - 0 Uruguay

Chile : Goal - Isla 81'; Red Card - Cavani, Fucile.

Man of the match: Jorge Valdivia, Chile.